Россия президенти Владимир Путин ва АҚШ етакчиси Дональд Трамп ўртасидаги музокаралар ҳали бошланмаган бўлса-да, глобал хавфсизлик тартибининг қайта кўриб чиқилиши аллақачон бошланмоқда. Чунки икки етакчи буюк давлатлар тизимини қайта тикламоқда. Ҳар қандай қарорни айнан улар қабул қилади. Бу ҳақда The Washington Post нашри хабар берди.
Манбага кўра, Путин Трампнинг элчиси Стив Уиткофф билан учрашгач, Украина президенти Владимир Зеленский билан маълум шартлар бажарилмагунча учрашмаслигини айтди. Шунингдек, у бу шартларнинг бажарилиши жуда узоқ эканлигини билдирди. Трамп ҳам Путиннинг таклифини қабул қилиб, Зеленскийнинг музокараларда иштирок этишини истамади. Улар Украинанинг 40 миллион аҳолиси тақдирини Владимир Зеленскийнинг иштирокисиз муҳокама қиладиган бўлди.
Қайд этилишича, АҚШ ҳудудидаги учрашув Путин учун ягона йирик ғалаба эмас. Музокаралар Трампнинг Россия нефтига нисбатан қаттиқ санкциялар жорий этиш таҳдидини четга сурди ва АҚШ президентининг ўт очишни тўхтатиш чақириқларини эътибордан четда қолдирди.
“11 август куни Трамп Путиннинг сўзларини такрорлаб, яна урушда Зеленскийни айблади. Бироқ 13 август куни Зеленский ва Европа етакчилари билан видеоконференция чоғида ярашишга мойил одам сифатида кўринди”, дейилади мақолада.
Таъкидланишича, Аляскадаги учрашув Путиннинг қадимий мақсадини акс эттиради. Яъни, у Россияни қонуний таъсир доираларига эга бўлган кам сонли жаҳон давлатларидан бири сифатида қайта тикламоқчи. Бундан ташқари, у Трамп билан шахсан учрашиб, унинг кўнглини олиш ва таъсир ўтказиш режасини амалга оширади.
Кремлнинг шахси аноним қолишини сўраган собиқ юқори лавозимли амалдори шундай деди: “Аляскадаги саммит Путин учун олтин имкониятдир. Албатта, АҚШга ташриф — улкан ғалаба”.
Кремлга яқин яна бир манба Аляскадаги саммит урушга қарши Россия элитасини тинчлантириш учун ўтказилмоқда, деб ҳисоблайди. Путин ва Трамп учрашуви эса урушни тугатиш учун реал имкониятни юзага келтириши мумкин.
Аналитикларнинг фикрича, Россия Трампнинг урушни тугатиш борасида берган ваъдасини ҳалигача бажара олмаганида, Украинани айбдор қилиб кўрсатмоқчи.
Россиялик таҳлилчилар Путин Украинадаги урушда ғалабага яқин деб ўйлайди. Унинг ўзи ҳам улкан йўқотишларга қарамай, муросага мойиллик билдирмаяпти. Стратегик ва халқаро тадқиқотлар марказининг ёзишича, ёз давомида россиялик ўлик ва ярадор аскарлар сони 1 миллионга етади.
Кремлнинг собиқ юқори лавозимли амалдори тушунтиришича, Путин энди урушдаги инсоний йўқотишларга эътибор бермайди.
“У худди тошбақа каби. Инсоний йўқотишлар энди унга таъсир қилмайди”, деган амалдор.
Унинг сўзларига кўра, Кремлдаги аксарият амалдорлар урушга қарши, бироқ буни Путинга айтишга қўрқади.
“Ҳамма Путиндан қўрқади. Ҳеч ким муросани муҳокама қилишни хоҳламайди, чунки ҳаммага ватанпарварлигини кўрсатиш керак. Мен Аляскадаги саммитга катта умид боғламайман. Улар ёки Украинага ультиматум қўяди, ёки жуда оз нарса эришган ҳолда кетади”, деган собиқ мулозим.
Изоҳ (0)