Франциянинг “Лион” клуби ярим ҳимоячиси Райан Шерки фаолиятини Англияда давом эттириши мумкин. Журналист Фабрицио Романо хабарига кўра, “Манчестер Сити” футболчини харид қилиш бўйича музокараларни бошлаган.
“Шаҳарликлар” марказий ярим ҳимоя ва ҳужум орти позицияларни кучайтириш устида иш олиб бормоқда. Бу трансферларга клубдаги айрим футболчиларнинг кетиши сабаб бўлмоқда. Улардан энг муҳимларидан бири — Кевин Де Брюйне. Клуб раҳбарияти 33 ёшли белгиялик футболчи билан шартнома узайтирмади. Шу боис “Сити” унга муносиб ўринбосар қидирмоқда.
Айни пайтда клуб бир нечта футболчиларга, жумладан “Милан” вакили Теяни Рейндерс ва “Ноттингем Форест” аъзоси Морган Гиббс-Уайтга эътибор қаратган.
Сўнгги кунларда эса “Сити” янада арзон, аммо муносиб номзод сифатида “Лион” футболчиси Райан Шеркига жиддий қизиқиш билдира бошлади. Унинг шартномасида 30–35 миллион евро атрофида товон пули белгиланган. Бу эса нафақат “Сити”, балки бир қанча АПЛ клубларининг ҳам эътиборини тортган.
Ўтган мавсумда Шерки Лига 1 доирасида 30 та ўйинда майдонга тушиб, ўз ҳисобига 8 та гол ва 11 та голли узатма ёздириб қўйган. Унинг “Лион” билан амалдаги шартномаси 2026 йил июнь ойида якунланади.
Изоҳ (0)