Англиянинг “Манчестер Сити” клуби “Милан” ярим ҳимоячиси Теяни Рейндерсни қўлга киритиш учун расмий таклиф тайёрламоқда. Бу ҳақда журналист Николо Скира хабар берди.
Манбага кўра, “шаҳарликлар” футболчи учун 60–65 миллион евро атрофида таклиф қилишни режа қилган. Шунингдек, улар Рейндерсга 2030 йилгача мўлжалланган шартнома ва йилига 8 миллион евро маош тўлашга тайёр. Бироқ “Милан” раҳбарияти нидерландиялик ярим ҳимоячини камида 80 миллион еврога сотишни режалаштирган.
Унга кўра, Пеп Гвардиоланинг шахсан ўзи “Сити” раҳбариятидан Теяни трансферини сўраган. Чунки ўтган мавсум ёмон натижалар фонида инглиз клуби барча позицияларни кучайтириб, яна совринли ўринларни эгалламоқчи.
CityXtra нашрининг қўшимча қилишича, “Манчестер Сити” ёзда яна 4 та футболчи билан шартнома имзоламоқчи. Якунига етган мавсум жамоада жароҳатлар билан боғлиқ муаммолар кузатилди. Шу боис “шаҳарликлар” ҳар бир позицияга бир нечта кучли футболчилар олиб келмоқчи.
Маълумот учун, якунига етган мавсум Рейндерс “Милан”нинг барча мусобақалар доирасидаги 54 та ўйинида майдонга тушиб, ўз ҳисобига 15 та гол ва 5 та голли узатма ёздириб қўйган. Футболчининг клуб билан шартномаси 2030 йилга қадар амал қилади. Transfermarkt портали 26 ёшли ярим ҳимоячининг қийматини 50 миллион еврога баҳолаган.
Изоҳ (0)