АПЛда «Манчестер Юнайтед» «шпорлар»га қарши, А Серияда «Рома» — «Милан» тўқнашуви, Бундеслигада «Бавария» Берлинга саёҳат қилади. Уик-энднинг марказий ўйинлари

АПЛ. Чемпионат «тулкиси» уйғонаётган «Арсенал»га қарши, «Тоттенҳэм» — Сульшер учун сўнгги имконият

«Лестер» — «Арсенал», 30 октябрь, 16:30

Брендан Рожерс шогирдлари 9 турдан сўнг 14 очко билан 9-ўринда бормоқда. Ушбу мавсумда «тулкилар» 4 та ғалаба, 2 та дуранг ва 3 та мағлубият қайд этди. Охирги 4 турдан буён «Лестер» мағлубиятга учрамай келмоқда: «Бёрнли» (2:2), «Кристал Пэлас» (2:2), «Манчестер Юнайтед» (4:2) ва «Брентфорд»га (2:1) қарши учрашувлар жамоанинг шижоатини янада оширди.

Чемпионатнинг 3-турида «Арсенал» «Манчестер Сити»дан 0:5 ҳисобидаги мағлубиятни қабул қилиб олганидан сўнг вазиятни чуқур таҳлил қилиб, ўзгаришга эришди. Шундан кейинги 6 турдан буён мағлубиятсиз серияни давом эттираётган Микель Артета шогирдлари 10-турда ҳам бу натижани тўхтатмаслик истагида. Ҳозирда «канонирлар» 14 очко билан 10-ўринни эгаллаб турибди.

Жамоаларнинг ўзаро охирги беш учрашувида: «Лестер» икки марта ғалаба қозонган, «Арсенал»да ҳам иккита ғалаба мавжуд, битта ўйин дуранг натижа билан якунланган.

«Тоттенҳэм» — «Манчестер Юнайтед», 30 октябрь, 21:30

«Шпорлар» 9 турдан сўнг АПЛнинг 6-ўрнини эгаллаб турибди. Уларнинг ҳисобида 15 очко мавжуд. Охирги пайтлар Нуну Эшпириту Санту шогирдлари учун омадсиз давр бошланган. Аввалига Конференциялар Лигасида «Витесс»га қарши ўйинда мағлубиятга учраган бўлса, АПЛда «Вест Ҳэм»га имкониятни бой берди. Жамоанинг асосий муаммоси ҳимоя чизиғи бўлиб турибди. Ҳужумда Сон ва Кейн ҳаракат қилган бўлса-да, ожиз нуқта сабаб мағлубиятга учради.

Лекин яна бир натижани унутмаслик лозим, «Тоттенҳэм» АПЛда ўз уйидаги 4 ўйиннинг 3 тасида ғалаба қозонган — «Манчестер Сити» (1:0), «Уотфорд» (1:0), «Астон Вилла» (2:1).

«Манчестер Юнайтед» эса 14 очко жамғарган ҳолда 7-ўринни банд этиб турибди. Аввалги турда «Манчестер Юнайтед» ўз уйида «Ливерпуль»га 0:5 ҳисобида мағлуб бўлди. «Тоттенҳэм»га қарши ўйин Сульшер учун охирги имконият бўлиши мумкин. Жамоа «Ливерпуль»га қарши ўйиндан қандай хулоса чиқаргани «шпорлар»га қарши баҳсда аниқ бўлади.

Қолган учрашувлар:

Ла Лига. Рональд Куман истеъфосидан сўнг «Барселона» илк учрашувини «Алавес»га қарши ўтказади, «Реал» «Элче» меҳмони бўлади

«Барселона» — «Алавес», 30 октябрь, 00:00

Октябрь ойининг ўрталарида «Барселона» «Валенсия»ни 3:1 ҳисобида мағлуб этди, кейин эса Чемпионлар Лигасининг 3-турида Киевнинг «Динамо»си устидан 1:0 ҳисобида ғалаба қозонди.

Каталонияликлар Ла Лигадаги охирги икки турни Мадрид жамоаларига қарши ўтказди. Аввалига «Реал» (1:2) га қарши ўйиндаги мағлубият, ундан сўнг «Райо Вальекано»га (0:1) ҳам имконият бой берилгач, раҳбариятнинг тоқати тоқ бўлди. Жамоа бош мураббийи Рональд Куман истеъфога чиқарилди ва унинг ўрнини вақтинчалик испаниялик мутахассис Серхи Бархуан эгаллади. «Барселона» 15 очко билан 9-ўринда бормоқда. Гранд жамоа учун бу яхши натижа эмас.

«Алавес» эса сўнгги 2 та ўйинда кетма-кет ғалаба қозонди. Жамоа 9 очко жамғарган ҳолда 16-ўринни банд этиб турибди. Тўплар нисбати — 5:13. «Барселона»га қарши учрашувда жамоа етакчиси Фернандо Пачеко шерикларига ёрдам бера олмайди.

Қолган учрашувлар:

А Серия. Рим ва Милан жамоалари тўқнашуви, «Аталанта» «Лацио»ни қабул қилади, «Наполи» Франк Рибери тўп сурадиган жамоага қарши

«Рома» — «Милан», 31 октябрь, 23:45

Жозе Моуриньо шогирдлари чемпионатни яхши бошлаган эди, лекин охирги турларда жамоанинг ишлари юришмаяпти. Конференциялар Лигасида «Будё Глимт»га қарши ўйиндаги қақшатқич 1:6 ҳисобидаги мағлубият, Италия чемпионатида эса «Наполи» (0:0) ва «Ювентус»га (0:1) қарши ўйинлар Жозе Моуриньони жиддий ўйга толдириб қўйди. Моуриньо «Рома» ривожланиш босқичида эканлигини таъкидлаб келмоқда. «Бўрилар» президенти ҳам португалиялик мутахассиснинг сўзларини қўллаб-қувватламоқда.

«Милан» эса Пиоли қўл остида Италия чемпионати пешқадами «Наполи» билан бир хил 28 очко жамғарган ҳолда иккинчи ўринда бормоқда. Жорий мавсум чемпионатда фақатгина бир марта «Ювентус»га қарши ўйинда (1:1) дуранг натижа қайд этди. Тўплар нисбати — 23:9. Урилган голлар ҳисоби бўйича фақатгина «Интер»дан ортда (24 та гол).

Қолган учрашувлар:

Бундеслига. «Бавария» Берлинда меҳмон бўлади, «Боруссия Д» «Кёльн»га қарши «жанг қилади»

«Унион Берлин» — «Бавария», 30 октябрь, 18:30

«Унион» жамоаси Бундеслигада 5-ўринда бормоқда. Жамоа ҳисобида 16 очко мавжуд. Чемпионатда 4 та ғалаба, 4 та дуранг ва 1 та мағлубият қайд этган. Коронавирусга чалингани сабаб Берлинликларнинг асосий футболчилари Марвин Фридрих ва Рик ван Дронгелен учрашувни ўтказиб юборади.

«Бавария» ортда қолган 9 турдан сўнг 22 очко билан чемпионат етакчиси бўлиб турибди. Юлиан Нагелсманн шогирдлари 7 та ғалабага эришган бўлса, битта ўйинда дуранг натижа қайд этган, битта ўйинда мағлубиятга учраган.

Германия Кубогида мюнхенликлар «Боррусия М» га 0:5 ҳисобида шармандали мағлуб бўлди ва мусобақани тарк этди. «Бавария»да ҳам коронавирусга чалинганлар бор, фақат мураббийлар орасида. Жамоа бош мураббийи Нагелсманн изоляцияга олинган.

Қолган учрашувлар:

Лига 1. Килиан Мбаппе иштирок этмайдиган турда «ПСЖ» амалдаги чемпионга қарши баҳс олиб боради, «Ленс» «Лион» меҳмони бўлади

«ПСЖ» — «Лилль», 29 октябрь, 00:00

Парижликлар Франция чемпионатида етакчиликни давом эттирмоқда. Жамоанинг ҳисобида 11 турдан сўнг 28 очко мавжуд. Аввалги турда «ПСЖ» «Марсель» меҳмони бўлди. Лионель Месси, Неймар ва Килиан Мбаппе бир вақтнинг ўзида майдонда бўлишига қарамасдан, ўйин 0:0 ҳисоби билан якунланди.

Кичик жароҳати сабаб Килиан Мбаппе «Лилль»га қарши кечадиган учрашув қайдномасидан ўрин олмади.

«Лилль» эса 15 очко билан 10-ўриндан жой олган. Франциянинг амалдаги чемпиони мавсумни омадсиз бошлади. Лекин охирги 5 турдан буён фақатгина битта мағлубият қайд этди ва 10 очко жамғаришга муваффақ бўлди. «Лилль» ушбу мавсумда меҳмондаги фақат битта учрашувда ғалаба қозонди.

Қолган учрашувлар:

Маъруфжон Очилов тайёрлади