Европанинг топ клублари аллақачон ёзги трансфер ойнасига тайёргарлик кўрмоқда. Кучайтириш зарур бўлган позициялар аниқланмоқда ва потенциал футболчилар рўйхати шаклланмоқда. Ҳар бир жамоага доимо зарур бўлган ўйинчилардан бири эса ҳужумчилардир. Олдинда турган трансфер ойнасида бир нечта тўпурар ҳужумчилар жамоасини алмаштириши кутилмоқда. Қуйида ёзда катта клубларнинг эътибор марказида бўлиши тахмин қилинаётган 10 нафар энг яхши ҳужумчи ҳақида маълумот берамиз.
Александер Исак (“Ньюкасл”)
2024/25 йилги мавсум: 31 ўйинда 19 гол, 5 ассист.
25 ёшли Исак ҳозир айни чўққисида. У Англия Премьер Лигаси тўпурарлар пойгасида 19 гол билан учинчи ўринда бормоқда (Муҳаммад Салоҳ – 27, Эрлинг Ҳоланд – 20). Бироқ “Ньюкасл” билан АПЛ ёки Чемпионлар Лигаси учун курашиш қийин. Шу сабаб у номдорроқ жамоага ўтишга тайёр.
Инсайдер Девид Орнштейннинг маълумотларига кўра, Исакка “Ливерпуль”, “Челси”, “Арсенал” ва “Барселона” қизиқиш билдирмоқда. “Ньюкасл” уни сотмоқчи эмас, аммо 150 миллион евролик таклиф келгудек бўлса, швециялик ҳужумчини сотиш ҳақида ўйлаб кўриши мумкин.
Виктор Дёкереш (“Спортинг”)
2024/25 йилги мавсум: 40 ўйинда 39 гол, 9 ассист.
Дёкереш статистикаси билан ҳаммани ҳайратга солмоқда. У деярли ҳар ўйинда гол урмоқда. “Бу Португалия чемпионати” дейишингиз мумкин, лекин Дёкереш Чемпионлар Лигасида ҳам 8 ўйинда 6 та гол уришни уддалаган.
26 ёшли ҳужумчи Чемпионлар Лигасида мунтазам ўйнайдиган клубга ўтишга тайёр. Аммо унга асосий даъвогар бўлиб турган “Манчестер Юнайтед”га, ўзининг собиқ устози Рубен Аморим ишлаётган жамоа билан шартнома имзолашни истамаяпти.
Билд ва Record.пт нашрлари хабарига кўра, Дёкереш учун асосий даъвогар – “Бавария”. GiveMeSport маълумотига кўра, унга “Челси” ҳам қизиқиш билдирмоқда. Флориан Плеттенберг эса “Манчестер Сити” ва “Барселона” ҳам швед футболчисини кузатаётганини маълум қилди. “Спортинг” уни 70-75 миллион евро эвазига сотишга тайёр, аммо футболчи шу темпда ўйнашни давом эттирса, бу нарх яна ошиши мумкин.
Бенямин Шешко (“Лейпциг”)
2024/25 йилги мавсум: 35 ўйинда 17 гол, 5 ассист.
21 ёшли словениялик футболчиси қишки трансфер ойнасидаёқ “Арсенал”га ўтиши мумкин эди, бироқ “Лейпциг” уни қўйиб юбормади. Аммо ёзда уни таркибда олиб қолиш немис клубига қийин бўлади.
Шешко ажойиб техника, тезлик ва яхши жисмоний ҳолатни ўзида жамлаган (бўйи – 193 см). Шу сабаб “Арсенал” унга жиддий тарзда қизиқмоқда (The Athletic). Бундан ташқари, “Манчестер Юнайтед” ҳам Шешкони кузатмоқда.
GiveMeSportънинг маълумотига кўра, Шешко “Челси”нинг ҳам “шорт-листи”дан жой олган. “Бавария” эса Дёкереш ва Шешко ўртасида танлов қилмоқда (Билд).
Жонатан Девид (“Лилль”)
2024/25 йилги мавсум: 39 ўйинда 22 гол, 10 ассист.
Канадалик ҳужумчи ёзда эркин агент сифатида “Лилль”ни тарк этиши кутилмоқда. Унинг шартномаси 2025 йилда тугайди ва у клуб билан келишувни узайтиришни истамаяпти. Transfermarkt портал футболчини 45 миллион еврога баҳоламоқда.
Ноябрь ойида Mundo Deportivo нашри Девиднинг “Барселона”га ўтиш нияти борлигини хабар қилган эди. Бундан ташқари, “Интер” ҳам канадалик футболчини кузатиб бормоқда. Бироқ ёзга яқин унга қизиқаётган клублар сони ортиши аниқ.
Олли Уоткинс (“Астон Вилла”)
2024/25 йилги мавсум: 40 ўйинда 14 гол, 11 ассист.
Уоткинс “Астон Вилла”нинг асосий ҳужумчиларидан ҳисобланади. У нафақат аниқ зарбалари, балки ҳужумларни ташкил этиш қобилияти билан ҳам бошқалардан ажралиб туради. Аммо 29 ёшида унинг топ-клубга ўтиш имконияти камайиб бормоқда.
Январда “Арсенал” Уоткинснинг вакиллари билан музокаралар олиб борган, аммо “Вилла”нинг 80 миллионлик талаби лондаликларни футболчини харид қилиш фикридан қайтишига сабаб бўлган эди. Маълумотларга кўра, томонлар ёзда яна музокара ўтказишга ҳаракат қилиб кўради. Агар келишув амалга ошса, футболчини Шимолий Лондонда кўришимиз мумкин.
Лиам Делап (“Ипсвич Таун”)
2024/25 йилги мавсум: 30 ўйинда 10 гол, 2 ассист.
“Манчестер Сити” академияси тарбияланувчиси бўлган Делап 2024 йил ёзида “Ипсвич”га ўтди ва АПЛ аутсайдерларидан бирида ўзини кўрсатишни бошлаб юборди. 21 ёшли футболчи АПЛ доирасидаги 26 та учрашувда майдонга тушиб, 10 гол уришга эришди. Ёш футболчи, қолаверса унчалик кучли бўлмаган жамоа сафида 10 та гол уриш яхши натижа. Шу боис Европанинг бир қанча жамоалари Лиам учун “Ипсвич”га таклиф тайёрлашга тайёр.
Маълумотларга кўра, ёзда у “Манчестер Юнайтед”га ўтиши мумкин. Бундан ташқари, “Челси” ва “Тоттенҳэм” ҳам Делап учун даъвогарлик қилмоқда.
Душан Влаҳович (“Ювентус”)
2024/25 йилги мавсум: 33 ўйинда 14 гол, 2 ассист.
Влаҳович “Ювентус”да муаммоларга дуч келмоқда. Рандал Коло Муани келганидан сўнг, серб ҳужумчиси захирага тушиб қолди. La Gazzetta dello Sport нашри хабарига кўра, унинг клуб бош мураббийи Тиаго Мотта билан алоқалари ҳам яхши эмас.
Инсайдер Николо Скиранинг маълумотларига кўра, “Ювентус” Душан учун 25-30 миллион евролик таклиф тушда, уни сотиб юборишга қарши эмас. Cаугҳт Оффсиде хабарига кўра, футболчига “Арсенал” ҳамон қизиқиш билдирмоқда. Шунингдек, “Манчестер Юнайтед” ҳам ҳужумчини сотиб олиш ҳақида ўйламоқда.
Мойзе Кин (“Фиорентина”)
2024/25 йилги мавсум: 32 ўйинда 19 гол, 3 ассист.
“Ювентус”га қайтиши омадсизликка учрагач, Кин “Фиорентина”га ўтди ва ушбу мавсум ажойиб ўйин кўрсатмоқда. Футболчи ҳозиргача Флоренсия клуби сафида 19 та гол уришга эришди. Шу боис 25 ёшли ҳужумчи ёзда топ-клубга ўтиш учун катта имкониятга эга бўлиб турибди.
Cаугҳт Оффсиде нашри берган маълумотларга кўра, футболчини харид қилмоқчи клуб шартномада кўрсатилган 55 миллион евролик товон пулини тўлаши шарт. Ҳозир “Арсенал” футболчи учун асосий даъвогар бўлиб турибди. Лондонликлар уни ёзги трансфер ойнаси вақтида сотиб олиш вариантини кўриб чиқишга тайёр. “Тоттенҳэм” ва “Астон Вилла” ҳам Кин билан шартнома имзолаш бўйича таклиф тайёрламоқда.
Виктор Осимҳен (“Наполи”, ижара асосида “Галатасарой”да ўйнамоқда)
2024/25 йилги мавсум: 29 ўйинда 23 гол, 5 ассист.
Виктор Осимҳен жорий мавсумни “Галатасарой”да ижара асосида ўтказмоқда. Аммо у ҳуқуқий жиҳатдан “Наполи”га тегишли. Бироқ футболчи ёзда “Наполи”ни тарк этиши деярли аниқ. 2024 йилда “Челси” билан тузиладиган шартнома муваффақиятсизликка учрагач, Виктор “Галатасарой”га ижарага берилди. Чунки Италия клуби футболчини рўйхатга киритмади ва трансфер амалга ошмагач, футболчи зудлик билан ўзига янги жамоа топишга тўғри келди.
Осимҳенга икки асосий даъвогар – “Манчестер Юнайтед” ва “Ювентус”. Business Дай нашрининг хабар беришича, “Наполи” ва манкунианликлар ўртасидаги битим 95 фоизга якунланган. Маълумотларга кўра, инглиз клуби футболчи учун 40 миллион евро ва Расмус Хойлундни “Наполи”га таклиф қилмоқда.
Мика Биэрет (“Монако”)
2024/25 йилги мавсум: “Штурм”да: 25 ўйинда 14 гол, 5 ассист.
“Монако”да: 11 ўйинда 10 гол, 3 ассист.
2 ой аввал Мика Биэретни фақатгина Австрияда билишарди, лекин ҳозир унинг номи кўплаб жойларда тилга олинмоқда. 22 ёшли ҳужумчи Австрия чемпионатида ўзини кўрсатгач, қишда “Монако” томонидан 13 миллион еврога сотиб олинди. У Францияда ҳам юқори натижа кўрсатмоқда ва катта клубларнинг эътиборига тушиши кутилмоқда. Даниялик футболчининг январдан кейинги статистикаси ажойиб: 11 учрашув, 10 гол ва 3 та голли узатма. Биэрет интервьюлар орқали Кейн ва Ҳоландга ҳавас қилишини айтиб ўтган. Ҳозирча ҳеч бир клуб Микага расмий тарзда қизиқиш билдиргани йўқ, аммо футболчи шу тарзда давом этса, ёзда “Бавария” ёки “Манчестер Сити” қизиқиши доирасига тушиши мумкинлиги айтилмоқда.
Championat.com сайтидан таржима қилинди
Изоҳ (0)