Моуриньо, Гвардиола, Анчелотти. АПЛ бош совринига эга чиққан энг ёш мураббийлар ҳақида

“Арсенал” бош мураббийи Микель Артета жамоаси билан Англия Премьер Лигаси 2022/23 йилги мавсумида ғолиб чиқса, мусобақани ютган энг ёш мураббийга айланади. Испаниялик мутахассис айни вақтда 41 ёшда.

“Канонирлар”нинг сўнгги ўйинлари ва натижаларидан кейин бу сценарий амалга ошишига ишонч камайиб бормоқда. Лекин ҳали Артетада рекорд ўрнатиш учун имкон бор.

Айни вақтдаги рекорд Жозе Моуриньога тегишли. Португалиялик мураббий 2004/05 йилги мавсумда “Челси” билан АПЛда ғолиб чиққанда 42 ёш-у 94 кунлик бўлган.

АПЛда ғолиб бўлган энг кекса мураббий эса Алекс Фергюсон ҳисобланади. Мутахассис “Манчестер Юнайтед” билан сўнгги марта Англия чемпионлигини қўлга киритганда 71 ёш-у 112 кунлик бўлган. Фергюсон илк чемпионлигини 51 ёш-у 122 кунлик бўлганида нишонлаган.

Қуйида Англия Премьер Лигасида ғолиб бўлган энг ёш мураббийлар ҳақида сўз боради.

Жозе Моуриньо (42 ёш-у 94 кунлик) — “Челси” (2004/05)

Жозе Моуриньо Англияга келиши билан ўзини “Беназир” (Special One) деб атади. Бунгача мураббий “Порту” билан муваффақиятли мавсум ўтказганди. Ўзининг биринчи мавсумидаёқ АПЛ чемпионлигини қўлга киритган энг ёш мураббийга айланди.

“Челси” мавсум давомида фақат 1 марта мағлуб бўлди ва турнир жадвалида 2-ўриндаги “Арсенал”ни 12 очкога ортда қолдирди. Моуриньонинг ҳимоявий услуби мавсум давомида тўлиқ ишлади ва жамоа 38 ўйинда 15 та гол ўтказиб юборди.

Жозе Моуриньо (43 ёш-у 93 кунлик) — “Челси” (2005/06)

Моуриньо муваффақиятли юришини иккинчи мавсумида ҳам давом эттирди ва яна чемпионга айланди. Бу португалиялик мураббийнинг чўққиси эди. Лондон клуби “Лион” футболчиси Майкл Эссиенни, “Манчестер Сити”дан Шон Райт-Филлипсни ўз сафига қўшиб олди. Жамоа нафақат Премьер Лигани балки Чемпионлар Лигасини ҳам ютишни хоҳлаётганди. Аммо “Челси” плей-оффнинг биринчи босқичидаёқ “Барселона”га мағлуб бўлиб, мусобақани тарк этди.

“Аристократлар” АПЛда 4 марта дуранг ўйнади ва 5 марта мағлуб бўлди. Шунга қарамай “Челси” иккинчи ўриндаги “Манчестер Юнайтед”ни 8 очкога ортда қолдириб, чемпионга айланганди.

Кенни Далглиш (44 ёш-у 71 кунлик) — “Блекберн” (1994/95)

Ушбу мавсумда чемпионлик тақдири сўнгги турда ҳал қилинган. Далглишнинг “Блекберн”и охирги турда “Энфилд”да “Ливерпуль” меҳмони бўлиши керак эди. Чемпионлик учун курашаётган “Манчестер Юнайтед” эса “Вест Ҳэм” майдонига сафар қилиши керак эди. “Блекберн” ғалаба қозонса, “қизил иблислар” қандай натижа қайд этса ҳам чемпионга айланарди. Бироқ Далглиш шогирдлари 1:2 ҳисобида мағлуб бўлди.

Аммо “Манчестер Юнайтед” “Вест Ҳэм”ни мағлуб эта олмади ва “Блекберн” Англия чемпионига айланди. Далглиш шогирдлари 89 очко тўплаб, Манчестер клубини 1 очкога ортда қолдирди.

Пеп Гвардиола (47 ёш-у 86 кунлик) — “Манчестер Сити” (2017/18)

Испаниялик мураббий Англияга “Барселона” ва “Бавария”да ўтказган 6 муваффақиятли мавсумидан сўнг келган. Пеп аллақачон 3 мартадан Ла Лига ва Бундеслига, шунингдек, 2 марта Чемпионлар Лигаси ғолиби бўлганди.

“Манчестер Сити” 2017/18 йилги мавсумда иккинчи ўриндаги “Манчестер Юнайтед”ни 19 очкога ортда қолдирганди.

Роберто Манчини (47 ёш-у 167 кунлик) — “Манчестер Сити” (2011/12)

Роберто Манчини “Манчестер Сити”га 2009 йилнинг декабрда Марк Хьюз истеъфога чиқарилганидан кейин келган. Италиялик мураббий дастлабки 2 мавсумида учинчи ва бешинчи ўринларни эгаллади. Манчини учинчи мавсумига келибгина ғалаба формуласини топа олди.

“Манчестер Сити” АПЛ чемпионлигини мусобақанинг сўнгги турида чемпионатда жон сақлаб қолиш учун курашаётган “Куинз Парк Ренжерс”га қарши ўйинда қўлга киритганди. “Манчестер Юнайтед” ўз ўйинида ғалаба қозонганди ва агар “шаҳарликлар” очко йўқоца чемпионликни бой берарди. “КПР”га 1:2 ҳисобида мағлуб бўлаётган “Манчестер Сити” асосий вақтга қўшиб берилган дақиқаларда иккита гол уриб, ғалабани, жумладан, чемпионликни илиб кетганди.

Антонио Конте (47 ёш-у 285 кунлик) — “Челси” (2016/17)

Антонио Конте Англияга Италияда “Ювентус” билан 3 карра А Серия чемпиони бўлганидан сўнг келганди. Мутахассис “Челси” билан Англия чемпиони бўлди ва Англия Кубогини қўлга киритди.

“Челси” апрель ойида “Кристал Пэлас” ва “Манчестер Юнайтед”га мағлуб бўлди. Бироқ мавсумни қаторасига 6 та ўйинда ғалаба қозониб якунлади. Конте жамоаси иккинчи ўриндаги “Тоттенҳэм”ни 7 очкога ортда қолдирганди.

Пеп Гвардиола (48 ёш-у 113 кунлик) — “Манчестер Сити” (2018/19)

Испаниялик мураббийнинг Англия Премьер Лигасидаги иккинчи чемпионлиги осонликча қўлга киритилмаган. “Ливерпуль” “Манчестер Сити”ни сўнгги тургача таъқиб қилган. Сўнгги турдан олдин ҳам жамоалар орасидаги фарқ 1 очкони ташкил қиларди. Гвардиола жамоаси охирги турда меҳмонда “Брайтон”ни мағлуб этган ва чемпионликни нишонлаган.

Арсен Венгер (48 ёш-у 193 кунлик) — “Арсенал” (1997/98)

Арсен Венгер “Арсенал” мураббийига айланганидан кейинги иккинчи мавсумида жамоани чемпионлик сари етаклаган. Бу АПЛ тарихидаги энг узоқ бошқарувлардан бирининг бошланиши эди. Венгер Лондон клуби билан 2 марта титул ютди, бироқ клубни халқаро майдонда ва ички чемпионатда рақобатбардош жамоага айлантирди.

Пеп Гвардиола (50 ёш-у 112 кунлик) — “Манчестер Сити” (2020/21)

Гвардиола 50 ёшида фаолияти давомидаги тўққизинчи, “Манчестер Сити” мураббийи сифатидаги учинчи  титулини қўлга киритган. “Шаҳарликлар” 86 очко тўплаб энг яқин таъқибчиси “Манчестер Юнайтед”ни 8 очкога ортда қолдирган. Ўша мавсумда Гвардиола шогирдлари 27 та ўйинда ғалаба қозонганди.

Карло Анчелотти (50 ёш-у 333 кунлик) — “Челси” (2009/10)

Карло Анчелотти Англияга Италияда “Парма”, “Ювентус” ва “Милан”даги фаолиятидан кейин келган. Италиялик мутахассис “Челси”даги биринчи мавсумидаёқ муваффақият қозонди. “Аристократлар” Анчелоттининг Италиядан ташқарида бошқарган биринчи жамоаси эди. Шунингдек, бу “Челси” учун Моуриньонинг дублидан кейин Премьер Лигадаги учинчи титул эди.

Англия Премьер Лигасининг 2022/23 йилги мавсуми тақдири катта эҳтимол билан сўнгги турда ҳал бўлади. 28 май куни “Арсенал” “Вулверҳэмптон”га қарши майдонга тушади. У вақтда Артета 41 ёш-у 62 кунлик бўлади. Испаниялик мутахассис Жозе Моуриньодан 397 кунлик кичик вақтида мусобақа чемпионлигини қўлга киритиши мумкин.

Бироқ охирги турлардаги кетма-кет учта дурангдан кейин испаниялик мутахассис ўзи ва жамоасини қийи аҳволга солиб қўйди. Иккита захира ўйинига эга “Манчестер Сити” “Арсенал”дан 5 очко ортда қолмоқда. 26 апрель оқшомида бўлиб ўтадиган ўзаро ўйин ҳам кўп масалага ойдинлик киритади.