Ижтимоий тармоқда 12 сентябрь куни 14 ёшли ўғли машина уриб юбориши оқибатида вафот этгани айтилган фуқаронинг видеомурожаати тарқалди. Унинг сўзларига кўра, ушбу автоҳалокат Миллий гвардия ходимининг Matiz автомобилини маст ҳолда бошқаргани сабаб бўлган. У қарама-қарши томондан келаётган Damas йўлини тўсиб қўйган, Damas ҳайдовчиси рулни ўнгга буриши оқибатида йўл четида турган пиёдани уриб юборган.
ЙҲХББ маълумотига кўра, ушбу воқеа 12 сентябрь куни соат 01:30 ларда Тошкент вилояти, Ўртачирчиқ тумани ҳудудидан ўтган 4Р20 «Қорасув –Бекобод» автомобиль йўлининг 8-километрида юз берган. Matiz 1980 йилда туғилган Т.М. бошқарувида, Damas эса 1978 йилда туғилган Г.Э. бошқарувида бўлган.
ЙТҲ оқибатида Damas ҳайдовчиси бошқарувни йўқотиб, йўлнинг ўнг томонида турган 2007 йилда туғилган пиёда А.К.ни уриб юборган. Оқибатда 14 ёшли ўспирин олган оғир тан жароҳатларидан шифохонада вафот этган.
Олиб борилган дастлабки тергов олди суриштирув жараёнларида Matiz ҳайдовчиси ҳақиқатан ҳам маст ҳолда эканлиги аниқланган. Мазкур ЙТҲ юзасидан Жиноят кодексининг 266-моддаси 2-қисми (транспорт воситалари ҳаракати ёки улардан фойдаланиш хавфсизлиги қоидаларини бузиш одам ўлимига сабаб бўлиши) билан жиноят иши қўзғатилган.
Кейинроқ Миллий гвардия матбуот хизмати Matiz ҳайдовчиси Миллий гвардия ходими эмаслигини маълум қилди.
«У олдин Тошкент шаҳар Қўриқлаш бошқармасининг ходими бўлган ва ўз хоҳиши билан ишдан бўшатилган. Уни олдиндан таниган фуқаролар томонидан берилган маълумотга кўра, ижтимоий тармоқларда тарқатилган видеотасвирда Миллий гвардия ходими деб ёдга олинган», — дейилади Миллий гвардия хабарида.
Изоҳ (0)