“Рома” ҳужумчиси Пауло Дибала фаолиятини Англияда давом эттириши мумкин. Бу ҳақда Il Romanista нашри хабар бермоқда.
Манбага кўра, 31 ёшли аргентиналик футболчига “Ливерпуль” клуби жиддий қизиқиш билдирмоқда. Мерсисайд клуби вакиллари аллақачон футболчининг агенти билан боғланиб, эҳтимолий трансфер шартларини муҳокама қилган. “Ливерпуль” ёзги трансферлар ойнасида ҳужум чизиғини кучайтиришни режалаштирмоқда. Бунга португалиялик футболчи Диогу Жотанинг яқинда автоҳалокат оқибатида вафот этгани сабаб бўлган. Нашрга кўра, Дибала ушбу позиция учун идеал номзод сифатида кўрилмоқда.
Маълумот учун, Дибала 2025 йил март ойидан бери майдонга тушмаган. У Италия А Сериясининг 29-туридаги “Кальяри”га қарши баҳсда жароҳат олиб, алмаштирилган эди.
Футболчининг “Рома” билан шартномаси 2026 йил июнига қадар амал қилади. Дибала Рим клубига 2022 йилнинг ёзида эркин агент сифатида қўшилган.
Ўтган мавсумда у А Серия доирасидаги 24 та ўйинда иштирок этиб, 6 та гол ва 3 та голли узатмага муаллифлик қилган. Transfermarkt портали Дибаланинг ҳозирги бозор қийматини 8 миллион еврога баҳоламоқда.
Изоҳ (0)