Бухоро вилоятининг Когон туманида март ойида автобус ва юк машинаси иштирокида ЙТҲ содир бўлгани, ағдарилган автобус ичида мактаб ўқувчилари бўлгани ҳақида хабар берилган эди. Болалар театрга олиб кетилаётган бўлган. Мазкур ҳолат юзасидан автобус ҳайдовчиси О.Ш.га нисбатан 20 сентябрь куни жиноят ишлари бўйича Когон шаҳар суди ишни кўриб чиққан. Бу ҳақда Олий суд матбуот хизмати “Дарё”га маълум қилди.
Суд иши маълумотларига кўра, автоҳалокат натижасида воқеа жойида бир нафар ва шифохонада яна бир нафар мактаб ўқувчиси вафот этган, бундан ташқари ўндан ортиқ бола тан жароҳати олган.
Автобус ҳайдовчиси О.Ш. Жиноят кодексининг 266-моддаси (транспорт воситалари ҳаракати ёки улардан фойдаланиш хавфсизлиги қоидаларини бузиш) билан айбланган. У судда айбига тўлиқ иқрор бўлган. Лекин ўқитувчиларга ўқувчиларни кузатиб бориш учун ички ишлар ходимлари ёки Миллий гвардия ходимлари бириктирилганми, деб сўраганида улар жавоб бермаганини айтган.
Айбланувчининг қўшимча қилишича, кейинроқ икки нафар Миллий гвардия ходими келган, лекин автобусга чиқмаган. Автобусда 36 нафардан ортиқ ўқувчи бўлгани сабабли тўлиб қолганини, кузатиб бориш учун ички ишлар ходимлари ҳамда автобусга “Болалар” ёзувини ёзиш кераклигини айтганида ўқитувчилар унга гапирмасдан автобусни ҳайдашини айтишган.
Бош прокуратура берган маълумотга кўра, ўз ишига беписандларча қараган шахсларга нисбатан Жиноят кодексининг 207-моддаси (мансабга совуққонлик билан қараш) билан жиноят иши қўзғатилган.
Суд ҳукмига кўра, судланувчи О.Ш. Жиноят кодексининг 266-модда 3-қисми “а” бандида назарда тутилган жиноятни содир қилганликда айбли деб топилган. Унга шу модда билан 3 (уч) йил муддатга барча турдаги транспорт воситаларини бошқариш ҳуқуқидан маҳрум қилиниб, 9 йил муддатга озодликдан маҳрум қилиш жазоси тайинланган.
Ҳукм қонуний кучга киргач, судланувчи О.Ш.дан автобус билан тўқнашган юк машинасига нисбатан 61 миллион 409 минг сўмлик моддий зарар “Гала Осиё Сохтимон” хусусий корхонаси фойдасига ундирилиши қайд этилган.
Суд болаларга етказилган моддий зарарни ундириш учун фуқаролик ишлари бўйича судга мурожаат қилиш ҳуқуқи тушунтирилган.
Изоҳ (0)