АҚШда суд Илон Маскга тегишли Tesla компаниясига қарши даъвони кўриб чиқишни бошлади. Корпорацияга автопилот режимида ҳаракатланган автомобилда ҳалок бўлган аёл сабаб даъво қўзғатилган. Бу ҳақда Bloomberg хабар бермоқда.
Манбага кўра, гап 2019 йилда содир бўлган ҳодиса ҳақида кетмоқда. 20 ёшли қиз Tesla электромобилида автоҳалокатга учраб ҳалок бўлган. Автомобиль автопилот режимида ҳаракатланаётган пайтда тўхтаб турган фургонни “кўрмай қолган” ва катта тезликда унга урилган. Суд ушбу фожиа учун ким айбдорлигини аниқлайди — энг хавфсиз электромобиль ишлаб чиқаришини даъво қиладиган Tesla компаниясими ёки мобил телефонини тушириб юборган ҳайдовчи?
Tesla версиясига кўра, бахтсиз ҳодиса ҳайдовчи айби билан содир бўлган. Леон машинанинг автопилот “режими”ни ёққан, бироқ смартфонини тушириб юбориб, уни олиш учун эгилган ва шу билан бирга оёғини тезлик педали устида қолдирган. Натижада электромобиль йўлдан чиқиб, тўхташ жойига кирган ва у ердаги фургон билан тўқнашган. Маск компанияси ўз баёнотида “авария автопилот тизими билан мутлақо боғлиқ эмас”лигини таъкидлайди. Шу билан бирга, Tesla 2019 йилда бундай ҳолатнинг олдини олиши мумкин бўлган ҳеч қандай фавқулодда тўхтатиш технологияси мавжуд бўлмаганини тан олди.
Суд ҳужжатларига кўра, ҳайдовчи бошқарувидаги автомобиль соатига 60 милдан ортиқ (тахминан 96 км/соат) тезликда Т кўринишидаги чорраҳадан тўхтамасдан ўтиб, йўл четида тўхтаб турган Chevrolet Tahoe автомобилининг ён томонига урилган. Автоҳалокат оқибатида 22 ёшли Наибел Бенавидес Леон ҳалок бўлган, унинг йигити, ушбу автомобиль эгаси Диллон Ангуло эса оғир жароҳат олган.
Даъвогарлар адвокатларидан бири Тодд Посес суд ҳужжатларида, автопилот тизимидаги конструктив камчиликлар автомобилга тўсиқларни, жумладан Chevrolet Tahoeъни аниқлашга имкон бермаганини ва натижада Леоннинг ўлимига олиб келганини таъкидлаган.
Автопилотда ҳаракатланаётган Tesla автомобиллари билан боғлиқ бахтсиз ҳодисалар илгари ҳам содир бўлган. Аммо бу иш судгача етиб келган кам сонли воқеликлардан бири. Агар корпорация ютқазса, уни катта молиявий йўқотишлар кутмоқда.
Илон Маск эса келажак автопилотли автомобилларники эканини таъкидлашда давом этмоқда ва навигация тизимларини ишлаб чиқишда хатоларга йўл қўйилганини рад этди. Tesla авариялар бўйича марҳумларнинг қариндошлари ёки жароҳатланганлар билан судлашган ҳолатларда эса, деярли ҳар сафар айбдор сифатида ҳайдовчилар тан олинган.
Изоҳ (0)