Фарғона вилоятида 19 яшар йигит автоҳалокат содир қилиб, ўзи билан бирга бўлган икки тенгдошининг ўлимига сабаб бўлди. Бу ҳақда вилоят ИИБ хабар берди.
Маълум қилинишича, ҳолат 29 август куни соат 03:30 ларда, Фарғона шаҳар Киргили мавзеси ҳудудидан ўтган 4Р-140А “Фарғона шаҳрига” автомобиль йўлининг 8-километрида содир бўлган. 2005 йилда туғилган ҳайдовчи Т.А. Spark’ни бошқариб кетаётиб, кескин тормоз босиб юбориши натижасида бошқарувни йўқотган ва йўл четидаги бетон симёғочга урилган.
Натижада Spark йўловчилари — 2005 йилда туғилган Қ.М., Ю.А., 2004 йилда туғилган Э.Ш., ва Н.Ф.лар тан жароҳати олиб, шифохонага ётқизилган. Кўрсатилган тиббий муолажаларга қарамасдан, автомобилда бўлган икки йўловчи Қ.М. ва Ю.А.лар шифохонада вафот этган.
Ўзбекистонда 2023 йилда транспорт воситасини бошқариш ҳуқуқидан маҳрум қилинганига қарамай, қайтадан рулга ўтирган шахслар 707 та ЙТҲ содир этган. Бунинг оқибатда 212 нафар шахс вафот этган, 546 нафари эса турли даражадаги тан жароҳатлари олган.
Ҳайдовчилик гувоҳномасидан маҳрум қилинганлар умумий ҳайдовчилар сонининг 0,3 фоизини ташкил қилгани ҳолда, улар томонидан содир этилган йўл-транспорт ҳодисалари жами юз берган аварияларнинг 11 фоизини ташкил этган.
2024 йилнинг биринчи ярмида Ўзбекистон бўйича қонуний равишда ўқиб, ҳайдовчилик гувоҳномасига эга бўлган шахслар томонидан 10 миллион 200 мингдан ортиқ қоидабузарлик содир этилган.
Қайд этилишича, бу даврда ЙТҲнинг 58,5 фоизи пиёдалар иштирокида содир этилган. Пиёдалар иштирокидаги ҳодисаларнинг 20 фоизи пиёдалар ўтиш жойлари ташкил этилмагани оқибатида, 19 фоизи эса пиёдалар ўтиш жойи мавжуд бўлса-да, пиёдалар томонидан онгли равишда йўл ҳаракати қоидаларига бўйсунмасдан йўлнинг белгиланмаган жойидан кесиб ўтишлари оқибатида содир бўлган.
Изоҳ (0)