Дунё ўткинчи, ўлим эса ҳақ. Хоҳ шоҳ бўлсин, хоҳ гадо, ажал ҳеч кимни аяб ўтирмайди. Минглаб мухлисларга эга санъаткорларининг кўпчилиги ижоди энг гуллаган, ҳаётга ҳали тўймаган вақтда вафот этган. Ўзбек санъати ва маданияти, эстрада ва шоу-бизнесидаги ана шундай тақдир эгаларининг ўлимига нима сабаб бўлганини хотирлаймиз.
Ажал машҳурларни ҳам четлаб ўтмайди
Актёр Отабек Ғаниев 1985 йил 1 август санасида 33 ёшида оламдан ўтган.
Мафтункор хонанда Райҳон Ғаниеванинг отаси, марҳума Тамара Шокированинг турмуш ўртоғи, афсонавий санъаткор Наби Ғаниевнинг набираси марҳум актёр Отабек Ғаниев ўз даврининг энг машҳур санъат вакилларидан эди. Режиссёр Наби Ғаниевнинг тўрт фарзанди бўлиб, уларнинг бирортаси санъаткор бўлишни истамаган. Фақатгина ўғли Ҳотамнинг фарзанди Отабек Ғаниев бобосининг касбини давом эттиради.
Отабек Ғаниев 1977 йили актриса Тамара Шокирова билан оила қуради. Икки ижодкорнинг муҳаббатидан қўнғироқ сочли қизалоқ Райҳон дунёга келади. Аввалига ҳаммаси яхши эди. Отабек Ғаниев энг яхши ролларни ижро этаётган пайтда бахтсиз ҳодисага учраб, вафот этади. Ўшанда Райҳон Ғаниева 6 ёшли қизалоқ эди.
Ўхшамаган турмуш ва бевақт ўлим
Актёр Зокир Мўминов 2000 йил 38 ёшида оламдан ўтган.
“Қиш сонатаси”даги Южин ва “Сарой жавоҳири”даги Тангемни ўзбекча гапиртирган актриса Зулхумор Мўминова Москвада ўқиб юрган кезлари курсдоши Зокир Мўминов билан бир-бирига кўнгил қўйишади. 4-босқичда таҳсил олаётган икки талаба ҳам Тошкентда, ҳам Россияда тўй қилишади. Москвадаги ётоқхонада ўтган тўйда катта қозонда ош пиширилади. 1985 йилда улар ўғил фарзанд кўришади ва Умид деб исм қўйишади.
— Актёр билан актёр яшаб кетиши қийин. Сабаби ҳар битта актёр ўзига хос олам. Ҳеч ким ҳеч қачон ўз оламидан воз кечиб, бошқа бировнинг оламида яшаб кета олмайди. Чунки ўз оламидан воз кечиш, ишидан воз кечиш дегани. Икки санъаткорнинг битта оилада муносиб тарзда, ўзини асраб қолган ҳолда, ўз дунёсини сақлаган ҳолда яшаб кетиши жуда катта мардликни талаб қилади. Биз Зокир билан кўп яшамадик, афсуски. Шунинг учун бу даврлардан ўта олармидик, йўқми, билмайман. Зокир ҳам касбини жуда яхши кўрарди. Бирга яшаганимизда нима бўларди, буни билиш менга энди қоронғи, дейди Зулхумор Мўминова.
Охунжон Мадалиев гиёҳванд моддалар қурбоними?
Хонанда Охунжон Мадалиев 2000 йилнинг 29 июнь санасида 37 ёшида вафот этган.
Охунжон Мадалиевнинг вафоти ҳақида одамлар орасида кўплаб миш-мишлар юради. Кимдир уни наркотик модда истеъмол қилиб вафот этган деса, бошқа биров суиқасд қурбони бўлган дейди.
— Мен ўша кунлари Охунжон акамга ҳайдовчи эдим, Tico’да юрардим. Тўй тугагач, Охун акамни акалари олиб кетганди. Тўй чиройли ўтгач, йўлга чиқдик. Охун акам тўйдан чарчаган, доим узоқ йўлда ухлаб кетар эди. Фарғонадаги “Гиргили” да Анвар ака ҳовлисига етиб бориб, Охун акамни уйғотишга уриндим, лекин у турмаяпти. Қўрқиб, тез ёрдамга мурожаат қилдик. Доктор Охун акамни 40 дақиқа олдин вафот этганини айтди. Биз бунга ишонмай, шок ҳолатида қолдик. Баъзи одамлар наркотик қабул қилгани ҳақида гапирганди, лекин Охун акам ҳеч қачон бундай моддалар истеъмол қилмаган эди. Бу ҳолат одамлар томонидан турлича талқин қилинди, дейди Охунжон Мадалиевнинг ҳайдовчиси Пўлатжон Омонов.
Хонанда аслида юрак хуружидан вафот этган.
Ажал қизиқчини саҳнада олиб кетган
Актёр ва қизиқчи Собит Асомов 1996 йил 27 март санасида 37 ёшида оламдан ўтган.
Ўзбекистонда хизмат кўрсатган артист Обид Асомовнинг акаси таниқли сўз устаси Собит Асомов 1996 йилда саҳнада рол ижро этаётиб вафот этган.
Ака-ука Собит ва Обид Асомовлар, Тўхтамурод Азизов, Ботирхўжа Муҳаммадхўжаев ҳамда Мирзабек Холмедов биргаликда “Кўзгу” театрини ташкил қилишган эди.
42 жойидан пичоқланган: қотил ҳамкасбларининг қурбони бўлган Лайло
Хонанда Лайло Алиева 1998 йил 1 май куни 23 ёшида машҳур ҳамкасблари қотиллигининг қурбони бўлган.
1990 йилларнинг ўзбек тингловчилари учун мегаюлдуз ҳисобланган Лайло Алиева икки яшарлигидан санъатнинг мода йўналишига кириб келган. Ўн ёшида гўзаллик танловларида ғолиб бўлган. Қўшиқ куйлаб, клипларда кўриниш бериб, омма эътиборига тушган ҳамда минглаб мухлислар орттирган. Бобоси заргар бўлгани туфайли Лайло ҳам болалигидан тилла тақинчоқларни яхши кўрган. Лайлонинг ўлдирилишига ҳам шу тиллалар сабаб бўлган. Ўша вақтларда машҳур бўлган “Ал-Вакил” гуруҳидаги икки қўшиқчи йигит 1998 йилнинг 1 майида Лайлонинг уйига гўё меҳмон бўлиб келган. Лайло уларни танигани учун ярим тун бўлишига қарамай уйига киритган. Бир оз суҳбатлашиб ўтиргач, йигитлар Лайлога ҳужум қилган ва 42 жойидан ваҳшийларча пичоқлаб ташлашган. Қотиллар унинг барча тилла тақинчоқларини, ҳатто бармоғидан чиқиши қийин бўлган узугини совун суркаб суғуриб олишган.
Қотиллар қўлга олиниб, қамоқ жазосига ҳукм қилинган. Лайлони дафн этишгач, оғир мусибатни кўтаролмай, отаси ҳам бир ойдан кейин вафот этган. Лайло Алиевадан ёлғиз ўғли Жасурбек ёдгор бўлиб қолган.
Беш йил ичида эр-хотиннинг кетма-кет вафоти
Актёр Алишер Ҳамроев 2005 йил май ойида 29 ёшида оламдан кўз юмган.
Ўрта ёш вакиллари актёр Алишер Ҳамроевни яхши танийди. Актёр “Дилхирож”, “Нотаниш полвон”, “Маржона”, “Ёдгор” каби фильмлардаги роллари билан мухлислар эътиборига тушган.
— Аслида куёвимиз 2004 йилда касал бўлган ва 2005 йилда оёғидан саратонга чалинганлиги сабабли вафот этган. Синглим эса бу ҳолатдан стрессга тушиб қолган, орадан уч йил ўтиб у ҳам вафот этди. Икки нафар фарзанди билан Тошкентга келганди, жуда қийналган, улардан ҳеч ким хабар ҳам олмаган. Вақт ўтиб оққон касаллигига чалинган, кейин яна болаларини олиб Бухорога кетган.
Яна қайтиб Тошкентга олиб келганимиздан кейин 10 кун даволаниб шу ерда вафот этди. Болалари Бухорода эди, дадамнинг уйига олиб бориб ўша ердан чиқарганмиз. Синглим онкология касалликлари шифохонасида ётганида Алишерни тушимда кўрдим, у менга сени қийналишингни хоҳламайман, ўзим билан олиб кетаман, деб айтди. Биз ҳайрон қолдик, синглим билан уйга бориб “ис” чиқардик. Унга ҳаммаси яхши бўлади, тушга нималар кирмайди, дедик. Бироқ орадан 10 кун ўтиб вафот этди, дейди актёрнинг қайнопаси Гулойим Маҳмудова.
Режиссёр қотили бўлган мардикор йигитлар
Актёр ва режиссёр, Скан-Мулти тахаллуси билан ижод қилган Искандар Аъзамов 2006 йил 23 июнда 28 ёшида суиқасд қурбони бўлган
Ўн бир йиллик ижоди давомида юзлаб мусиқий видеоклипларни суратга олган Искандар Аъзамов ўз уйида икки нафар йигит томонидан шафқатсизларча пичоқлаб ўлдирилган. Унинг хизматини қилиб юрган мардикор йигитлар унинг орқасига ва юрагига бир неча марта пичоқ урган. Қотилларнинг санъаткорни ўлдиришдан мақсади пул бўлган — улар режиссёрнинг уйида пул кўп бўлади деб ўйлаган. Аммо бундай бўлиб чиқмаган. Жиноятчилар ушланиб, уларга қилмишига яраша жазо тайинланган.
30 га кирмай вафот этган сухандон
Сухандон ва хонанда Дилдора Қаюмова 2008 йилда 28 ёшида оламдан ўтган
Устазода ижодкор таниқли телевидение режиссёри Зокир Қаюмов ва Ўзбекистон халқ артисти Малика Қаюмованинг фарзанди Дилдора Қаюмова карьерасини 1998 йилларда телевидениеда бошлаган. “Унутмоқ осонмас”, “Мусиқий танаффус”, “Янги йилда янги қўшиқлар” каби бир қанча лойиҳалардаги чиқишлари билан танилган. Қўшиқчилик фаолиятида ҳам бир қанча тароналари билан ўз мухлисларини топган Дилдора Қаюмова 28 ёшида вафот этган. Унинг бир нафар ўғил фарзанди бор.
Мудҳиш автоҳалокат қурбони бўлган Мўмин
“Божалар” гуруҳи аъзоси хонанда Мўмин Орипов 2009 йилнинг 28 июлида автоҳалокат оқибатида 25 ёшида вафот этган.
“Жийда гуллаганда”, “Бойвачча”, “Анҳор бўйида”, “Эслама мени” каби қўшиқлари билан ёшлар орасида шуҳрат қозонган “Божалар” гуруҳи аъзоси Мўмин Орипов ҳам ҳаётдан эрта кўз юмган. 2009 йилнинг 28 июнидан 29 июнига ўтар кечаси Сурхондарё вилоятининг Ангор туманида, “Божалар” гуруҳи йигитлари гастролдан қайтаётган вақтда мудҳиш автоҳалокат юз берган.
—Тожикистонга концерт қўйишга борганмиз, Душанбеда ва Регарда концертдан сўнг Сурхондарёга йўл олганмиз. Йўлда чарчаб, Ангорда ухлаб қолганмиз ва шу ерда автоҳалокат бўлган. Елкам синиб, ўпкамни тешиб, умуртқамнинг пастки қисми ҳам шикастланган. Ҳалокатдан кейин бир неча марта операция қилиндим — Термизда ўпкамга лазер жарроҳлик, Тошкентда эса елка ва умуртқа операцияси ўтказилди. Ҳали ҳам даволаниб тураман.
Бу воқеа ҳақида эслашни хоҳламайман. Мўмин менинг ҳақиқий дўстим эди, у билан шоу-бизнесдан олдин ҳам бирга ишлардик. Шифохонада, воқеадан 20 кун ўтиб, Мўминнинг вафот этганини билганман. Ўша пайтда энди операциядан чиққаним, сиқилиш мумкин эмаслиги сабабли мендан яширишган. Бу хабарни менга Дилмурод ака (Доктор Д) айтган. Мўминни йўқотганимни эслаш жуда оғир, дея хотирлайди Жавлон Шодмонов.
Мўмин Ориповнинг Камола исмли аёли ва бир ўғли бор. Жаҳонгир Позилжонов дўстининг хотирасига ўғлининг исмини Мўмин деб қўйган. Хонанда ҳаёт бўлганида бу йил 41 ёшни қаршилаган бўлар эди.
Контрабандачилар сабаб ҳалок бўлган рэпер
Radius 21 тахаллуси билан танилган хонанда Шаҳзод Ғуломов 2010 йилнинг 11 сентябрида 29 ёшида оламдан ўтган.
Болалигидан санъатга қизиққан Шаҳзод санъат олийгоҳининг оммавий байрамлар режиссёрлиги йўналишида ўқиган. Ўқишни тамомлагач, телевидениедаги Radius 21 номли муаллифлик кўрсатуви томошабинлар эътиборига тушади. Кейинроқ қўшиқ куйлашга бўлган муҳаббати уни хонандаликка етаклайди ва Шаҳзод Ғуломов реп йўналишида куйлай бошлайди. Рэпернинг деярли барча қўшиқлари оммалашиб кетади, ҳатто ҳозирги кунга қадар ўз тингловчиларига эга.
2010 йилнинг 12 сентябрида хонанда Пискент шаҳри постига яқин жойда Matiz русумли машинасида оиласи билан кетаётган бўлган. Уларга қарама-қарши йўналишдан эса контрабанда маҳсулотларини постдан олиб қочаётганлар келиб урилган. Шаҳзод Ғуломов автоҳалокат бўлган вақтда, воқеа жойининг ўзида оламдан ўтган, уч ярим ойлик фарзанди Бексултон эртаси куни вафот этган. Бексултон хонанданинг ёлғиз фарзанди эди.
Қандли диабетга қарши курашган комик
Комик актёр Шуҳрат Нуралиев 2017 йил 22 ноябрь санасида 37 ёшида вафот этган.
Шуҳрат Нуралиев Ўзбек миллий драма театри ва кинодаги қатор роллари билан танилган. “Осмондаги болалар”, “Девона”, “Улфатлар-2”, “Янги бой”, “Севгинатор-2”, “Зарб” фильмларидаги роллари уни янада машҳур қилган. Қандли диабет касаллигидан азият чекиб келаётган санъаткор чуқур кома ҳолатига тушиб қолган ва Эндокринология институтида ҳаёт учун курашган. Аммо 2017 йилнинг кузида актёр бу ёруғ оламдан кўз юмган.
“Халқаро хотин-қизлар куни”да вафот этган актриса
Актриса Ҳилола Тошмуҳаммедова 2018 йилнинг 8 мартида 32 ёшида дунёдан кўз юмган.
Актриса 7 март куни ишдан уйга қайтгач тоби қочган, шифохонада эса қон босими кескин тушиб кетган. Оқибатда 8 март санасида вафот этган. Ҳилола Тошмуҳаммедова “Фариданинг дил дафтари”, “Кўнгил” каби спектакллар, бир қатор фильм ва сериалларда роллар ижро этганди.
Пиёдалар йўлакчасидаги автоҳалокат
Актриса Фарангиз Режаметова 2018 йил 20 июлда автоҳалокат оқибатида 25 ёшида ҳалок бўлган.
“Ойижон” фильмидаги бош роли билан танилган актриса, Фотима Режаметованинг қизи Фарангиз Режаметова санъаткорлар оиласида дунёга келган. Ўзбекистон Давлат жаҳон тиллари университети “Халқаро журналистика” факультети битирувчиси бўлган 25 ёшли актрисани 2018 йил 20 июль куни соат 21:15 атрофида Абдулла Қодирий ва Маҳатма Ганди чорраҳасидаги пиёдалар ўтиш жойида Mercedes-Benz машинаси уриб кетган. Ҳайдовчи Фарангизни касалхонага олиб борган, аммо актриса йўлда оламдан ўтган.
Номус ҳимояси: ҳаракатланаётган юк машинасидан тушиб кетган
Актриса Гавҳар Шарипова 2019 йилнинг 19 ноябрида 39 ёшида оламдан ўтган.
2019 йилнинг 18 ноябрдан 19 ноябрга ўтар кечаси соат 02:20 ларда, Ғузор тумани йўлида Isuzu юк автомобили ҳайдовчиси йўловчи сифатида кетаётган Гавҳар Шариповага шилқимлик қилган. Бир қўли рулда бўлиб, ўнг қўли билан актрисанинг елка ва қўлларини ушлаган. Актриса автомобиль эшигини очиб, уни ушлаб турган. Ҳайдовчи буни кўра туриб ҳаракатланишда давом этган. Оқибатда ўзини ҳимоя қилишга уринган Гавҳар Шарипова автомобиль кабинасидан тушиб кетиб, ҳодиса содир бўлган жойда вафот этган.
“Уммон” юлдузининг оққонга қарши кураши
Хонанда Жасур Рафиқов 2022 йилнинг 14 ноябрида саратон касаллигини бошдан кечириб, 31 ёшида оламдан ўтган.
— 2020 йили ўғлимнинг пешонасида шиш пайдо бўлди. Шифокорлар уни “жировик” деб хато ташхис қўйдилар, лекин кейин шаҳар онкологиясига текширувга олиб борилганда, ўғлимнинг ҳолати жиддий эканлиги маълум бўлди. Шифокорлар таҳлилларни Ҳиндистонга юборишни тавсия қилдилар, аммо ўғлимнинг аҳволи ёмонлашди. Кейин укамнинг ёрдамида Республика онкологиясида бошқа бир шифокор кўрди ва томоғида шиш борлигини аниқлади. Шундан сўнг операция қилинди. Ўғлим кимё терапия олишни бошлади, лекин баъзи шифокорлар унинг ҳолатини енгиллаштира олишмасди. Ўғлимнинг касаллиги суякларга тарқалди, аммо у ҳамиша Аллоҳга таяниб, синовга сабр билан қаради. Тўртинчи кимё терапиядан сўнг унинг аҳволи яхшиланди-ю, аммо хушсурат бўлиб, Аллоҳнинг номини айтиб вафот этди.
“Она, бир кун ўлсам нариги дунёга қўшиқларим билан бормайман-ку”, деган гапи ҳалигача қулоқларим остида жаранглайди. Кичик бизнесларни йўлга қўйиб тирикчилик қилиб юрди, дейди Ноила Рафиқова.
Бурун операциясидан омон чиқмаган блогер
Блогер Фарҳод Маннопов 2023 йил 5 март куни 27 ёшида оламдан ўтган.
“Mittivine” кулги жамоаси асосчиси вайнер Фарҳод Манноповнинг ўлими унинг мухлислари қалбини ларзага келтирди. У эндигина 27 ёшни қаршилаган эди. У хусусий клиникалардан бирига бурун шаклининг қийшайиши ва олган жароҳати сабаб мурожаат қилган. Операция пайтида нотўғри қилинган наркоз оқибатида унинг юраги уришдан тўхтаган.
Фарҳод Маннопов отасиз, камтарона оилада улғайганини яширмасди. У вайнерлик фаолиятини бошлашдан аввал ўқиш билан бирга официантлик ҳам қилган. 2020 йили яқин дўсти Улуғбек Шодибеков билан ҳамкорликда вайнерлик фаолиятини бошлаганди.
Қаттиқ шамоллаш клипмейкерни ўлимга олиб келган
Клипмейкер Жасур Шаметов 2024 йилнинг 10 февраль санасида 39 ёшида вафот этган.
Жасур Шаметов ўзбек эстрадасининг энг машҳур хонандалари билан ҳамкорликда ишларди. Ижтимоий тармоқларда машҳур клипмейкернинг ўлими билан боғлиқ турли миш-мишлар тарқалди. Улар орасида ҳатто Жасур Шаметов ўз жонига қасд қилгани билан боғлиқ хабарлар ҳам бор эди.
— Акамни ўлик ҳолда биринчи мен кўрдим. Жуда кўп гап-сўзлар тарқалди, менда ўлим ҳолати юзасидан экспертларнинг хулосаси ҳам бор. Аввало ҳаммаси Аллоҳнинг иродаси. Акам иккимизнинг уйимиз жуда яқин, бир ҳафта олдин онамнинг олдига келиб қон босими ошаётгани ҳақида айтиб қолди. Охирги икки кунда эса қаттиқ шамоллаганди. 9 февраль куни кечаси 20:30 да қўнғироқларга жавоб бермагач, деразадан ошиб уйга кирдим. Ўшанда акамни жонсиз ҳолатда кўриб, шокка тушдим. Экспертлар акамга пневмония ташхисини қўйди, дейди клипмейкернинг укаси Жавлон Шаметов.
19 баҳорида вафот этган Ширин
Хонанда Ширин Абдуллаева 2025 йил 15 февраль куни 19 ёшида бу ёруғ дунёни тарк этди.
Хонанда Ширин Абдуллаева шу йилнинг 15 февралида 19 ёшида оламдан ўтди. Унинг вафоти сабаблари оила аъзолари томонидан очиқ-ойдин айтилмаган бўлса-да, у катта эҳтимол билан менингит хасталиги билан курашиб келган.
Ширин 2005 йил 14 декабрь санасида Наманган шаҳрида дунёга келган. Пекиндаги Sinxua университети талабаси бўлган қўшиқчи 2023 йилда санъат йўналиши бўйича Зулфия номидаги давлат мукофоти билан тақдирланган.
Ширин уч ёшга тўлар-тўлмас қўшиқ куйлашни бошлаган, ўзи қўшиқ ёзарди, республика ва халқаро мусиқий танловларда қатнашарди ҳам кинода суратга тушарди. Шириннинг азалий орзуси ўзининг жонажон ватани Ўзбекистоннинг номини халқаро майдонда донг таратиш эканини айтганди.
У наманганлик йирик тадбиркорлардан бири Баҳодир Абдуллаевнинг беш нафар қиз фарзандининг кенжаси эди.
Изоҳ (0)