Бухорода Nexia ва Damas тўқнашиб кетиши оқибатида икки киши оғир тан жароҳати олиб, шифохонага ётқизилди. Бу ҳақда «Дарё»га вилоят ИИБ ЙҲББ ахборот хизмати раҳбари Улуғбек Шукруллаев хабар берди.
Қайд этилишича, ЙТҲ вилоят ҳудудидан ўтган халқаро аҳамиятга эга А-380 Ғузор—Бухоро—Нукус—Бейнов автомобиль йўлининг 240-километрида содир бўлган. Nexia автомашинаси қарама-қарши йўналишда ҳаракатланиб келаётган Damas билан тўқнашиб кетган. Оқибатда Damas автомашинасининг икки нафар йўловчиси оғир тан жароҳати олиб, шифохонага ётқизилган.
«Ҳозирда ҳолат юзасидан Жиноят кодексининг 266-моддаси (транспорт воситалари ҳаракати ёки улардан фойдаланиш хавфсизлиги қоидаларини бузиш) бўйича иш қўзғатилган. Аниқланишича, ҳар икки автомашинага ҳам жиддий зарар етган. Икки нафар йўловчининг оғир аҳволдалиги сабаб айни пайтда терговга қадар суриштирув ишлари олиб борилмоқда», — дейди Улуғбек Шукруллаев.
Аввалроқ Наманганда Cobalt йўл четидаги чуқурга тушиб кетиши оқибатида йўловчи ҳалок бўлгани, Қаршида эса Lacetti ҳайдовчиси пиёдани уриб юбориши оқибатида жабрланувчи шифохонада вафот этгани хабар берилганди.
Изоҳ (0)