Қозоғистонда автоҳалокат сабаб онасидан айрилган ўзбекистонлик қиз ватанга қайтарилди. Бу ҳақда болалар омбудсмани хабар берди.
Келтирилишича, Қорақалпоғистоннинг Беруний туманида яшовчи фуқаро Э.А. томонидан болалар омбудсманига мурожаат йўлланиб, унда унинг 2010 йилда туғилган набираси Э.М.нинг ҳуқуқий ҳолати бўйича амалий ёрдам сўралган.
Мурожаатда айтилишича, Э.А.нинг қизи Д.Р. бир неча йил аввал Қозоғистон фуқаросига турмушга чиққан. Фарзанди Э.М. Беруний туманида туғилган ва Ўзбекистон фуқароси ҳисобланади. Шунга қарамай, онаси томонидан унга Қозоғистонда ҳам туғилганлик тўғрисидаги гувоҳнома расмийлаштирилган.
2024 йил август ойида содир бўлган йўл-транспорт ҳодисаси оқибатида қизи вафот этган. Шундан сўнг, вояга етмаган Э.М. Қозоғистонда ота-она қарамоғисиз қолган. Бу ҳолат юзасидан буви набирасини Ўзбекистонга қайтаришда ёрдам сўраб мурожаат қилган.
Мазкур мурожаат Болалар омбудсмани томонидан кўриб чиқилиб, Ички ишлар вазирлиги ҳамда Ўзбекистоннинг Қозоғистондаги Бош консуллиги билан ҳамкорликда зарур чора-тадбирлар кўрилди. Тезкор тартибда вояга етмаган Э.М.нинг ҳужжатлари расмийлаштирилиб, унинг Ўзбекистонга қайтарилиши таъминланди.
2025 йил 12 май куни вояга етмаган қиз холаси ҳамроҳлигида Ўзбекистонга олиб келинди ва расмий тартибда бувиси қарамоғига топширилди. Ҳозирда вояга етмаган қиз бўйича васийликни расмийлаштириш ишлари қонунчиликка мувофиқ давом эттирилмоқда.
Хориждан Ўзбекистонга қайтарилган болалар
2024 йил август—сентябрь ойларида хорижда ота-она қарамоғидан маҳрум бўлган 34 нафар бола Ўзбекистонга қайтарилганди. Октябрь ойида Россияда қаровсиз қолган 8 ойлик чақалоқ Ўзбекистонга, ота-онаси бағрига қайтарилди. Москвадаги вояга етмаган ҳуқуқбузарларни вақтинча сақлаш марказидан 4 нафар бола Ўзбекистонга олиб келинди. Ўша ойда Туркияда ота-онасининг қаровисиз қолиб кетган уч нафар вояга етмаган бола Ўзбекистонга қайтарилди. Ноябрда Дубайни тарк этиш тақиқланган ўзбекистонлик болага ватанга қайтишига ёрдам берилди. Декабрда Россияда ота-она қарамоғисиз қолган 15 нафар бола Ўзбекистонга қайтарилди.
Шунингдек, Россиянинг Тива Республикаси Оқ Довурак шаҳрида вақтинча ишлаётган ва ҳужжатларини йўқотган тўрт нафар Ўзбекистон фуқароси ватанга қайтарилганди.
Изоҳ (0)