FIFA 2026 йилги футбол бўйича Жаҳон чемпионати учун чипталар сотуви босқичма-босқич амалга оширилишини маълум қилди. Дастлабки босқич 2025 йилнинг 10 сентябрь санасида бошланади. Бу ҳақда AlJazeera нашри хабар берди.
Мусобақа Мексика, АҚШ ва Канада мезбонлигида ўтади. FIFA барча футбол ишқибозларини чипталарни харид қилиш имкониятига эга бўлишлари учун ташкилотнинг расмий сайтида рўйхатдан ўтишга чақирди.
Биз бутун дунёни яна Шимолий Америкада кутиб олишдан мамнунмиз. Бу тарихдаги энг йирик ва энг улкан спорт тадбири бўлади. Футбол ишқибозларига мурожаат қиламиз: жойингизни кафолатлаб қўйишга ҳозирдан тайёрланинг, — деди FIFA президенти Жанни Инфантино.
FIFA ҳозирча ҳар бир босқич тафсилотларини очиқламаган. Бироқ ташкилотнинг маълум қилишича, 10 сентябрьдан бошлаб рўйхатдан ўтган мухлислар илк бор чипта сотиб олишга ариза топшириш ҳуқуқига эга бўлади.
2025 йил 10-сентябрьдан бошлаб, 2026 йил 19 июлгача бир нечта алоҳида савдо босқичлари бўлади. Ҳар бир босқичда чипта харид қилиш жараёни, тўлов усуллари ва маҳсулот турлари фарқланиши мумкин. Ҳар бир босқич бўйича тўлиқ маълумотлар яқин ойлар ичида эълон қилинади, — дейилади FIFA баёнотида.
Мусобақа тафсилотлари
2026 йилги Жаҳон чемпионати 48 та терма жамоанинг иштирокида ўтказилади ва жами 104 та ўйин бўлиб ўтади. Ундан:
- Мексика – 13 та учрашувга,
- Канада – 13 та учрашувга,
- АҚШ эса қолган барча ўйинларга, жумладан чорак финалдан финалгача бўлган барча босқичларга мезбонлик қилади.
Мусобақанинг очилиш учрашуви 2026 йил 11 июнда Мексиканинг Мехико шаҳрида бўлиб ўтади, финал баҳси эса 19 июль куни АҚШнинг Нью-Жерси штатида жойлашган стадионда ташкил этилади.
Эслатиб ўтамиз, Темур Кападзе бошчилигидаги Ўзбекистон миллий терма жамоаси ҳам 2026 йилги Жаҳон чемпионатига йўлланмани қўлга киритган.
Изоҳ (0)