Актриса Гавҳар Зокированинг эслашича, бўлажак турмуш ўртоғининг акаси, Ўзбекистон халқ артисти Ботир Зокиров уйига совчи бўлиб келганида отаси ҳаяжондан тўйга розилик бериб юборган. У бу ҳақда “Қурултой” подкастига берган интервьюсида маълум қилди.
Биз Жамшид Зокиров билан бирга ўқирдик. Акаси Ботир Зокиров уйимизга совчи бўлиб келишини ота-онам билмаган. Эр-хотин қотиб қолишган. У кишининг индамасдан хонадонимизга кириб келиши даҳшат воқеа бўлган. Ботир Зокиров “Укам сизнинг қизингизни олмоқчи”, деган. Дадам “А?! Менинг қизимни оладими? Сизнинг укангизми? Омин, Аллоҳу акбар, олиб кетаверинглар!”, деб жавоб берганди, дейди Гавҳар Зокирова.
Актрисанинг айтишича, қайнотаси Карим Зокиров ўғлининг тўйи учун учун қарз олган.
У вақтларда ёрдам кассаси бўларди. Ўша ердан қайнотам Карим Зокиров ўғлини уйлантириш учун катта қарз олган. Тўйимиз 1971 йилда бўлган, қайнотам 1977 йилда вафот этдилар. Қарзларни тўлаб бўлгандан кейин оламдан ўтдилар. Жамшид акам билан ўша ҳужжатни кўрганмиз. Лекин бирон маротаба “Мен сизларнинг тўйингиз учун қарз олганман” деб айтмаган. Шунақа олийжаноб оила эди, дейди актриса.
Гавҳар Зокированинг турмуш ўртоғи — Ўзбекистонда хизмат кўрсатган артист, кино ва театр актори Жамшид Зокиров узоқ давом этган саратон касаллик оқибатида 2012 йилда вафот этган. Қайнотаси ЎзССР халқ артисти Карим Зокиров 1912—1977 йилларда яшаб, ижод қилган. Қайнакаси Ботир Зокиров хонанда (лирик-драматик тенор), актёр, рассом. Ўзбек замонавий профессионал эстрада қўшиқчи (ижрочи)лигининг асосчиси, Ўзбекистон халқ артисти, “Буюк хизматлари учун” ордени соҳиби.
Маълумот учун, “Юксалиш” ҳаракати ўтказган сўровнома натижасига кўра Ўзбекистонликларнинг чорак қисми тўй қилиш учун қарз олади.
Изоҳ (0)