Ўзбекистон терма жамоаси Жаҳон чемпионати саралашининг 3-босқичини муваффақиятли якунлаб, мундиал йўлланмасини қўлга киритди. Жамоа 10 та учрашув ўтказиб, 21 очко жамғарди ва А гуруҳида иккинчи ўринни эгаллади.
Саралаш давомида Ўзбекистон терма жамоаси 6 та ғалаба, 3 та дуранг қайд этди. Яна бир ўйинда эса имкониятни бой берди. Темур Кападзе бошчилигидаги жамоа Эронга қарши икки ўйинда (0:0, 2:2) ҳамда БААга сафардаги учрашувда (0:0) муроса йўлини танлади. Ягона мағлубият эса Қатар терма жамоасидан қабул қилинди (2:3).
Жамоа саралаш давомида рақиб дарвозасига 14 та гол уриб, ўз дарвозасидан 7 та гол ўтказиб юборди. Аббосбек Файзуллаев 3-босқичда 4 та гол билан “Оқ бўрилар” сафида тўпурар бўлди. Элдор Шомуродов эса 2 та гол муаллифига айланди. Қолган 8 та голни 8 нафар футболчи киритди: Ҳожиакбар Алижонов, Игор Сергеев, Отабек Шукуров, Азизбек Турғунбоев, Жалолиддин Машарипов, Ҳусниддин Алиқулов, Ҳожимат Эркинов ва Остон Ўруновнинг ҳар бири биттадан гол уришга муваффақ бўлди.
Ўзбекистон терма жамоаси ўз уйида ўтказган барча учрашувларда ўз дарвозасини даҳлсиз сақлади. Жамоа “Бунёдкор” стадионида ўтган 5 та ўйинда майдонга тушиб, барчасида ўз дарвозасидан гол ўтказиб юбормади.
Ўзбекистон — КХДР 1:0
Ўзбекистон — Эрон 0:0
Ўзбекистон — БАА 1:0
Ўзбекистон — Қирғиз Республикаси 1:0
Ўзбекистон — Қатар 3:0
Саралаш давомида Ўзбекистон дарвозасига фақат уч терма жамоа гол уришга муваффақ бўлди — Эрон, Қатар ва Қирғизистон. Бишкекдаги баҳс 3:2 ҳисобида Ўзбекистон фойдасига якунланди, Теҳронда эса Эрон билан 2:2 дуранг қайд этилди. Доҳадаги Қатарга қарши ўйинда эса 2:3 ҳисобида имконият бой берилди.
Изоҳ (0)