Мадриднинг “Реал” клуби ҳужумчиси Родригога Англия Премьер Лигасининг бир қанча жамоалари қизиқиш билдирмоқда. Бу ҳақда инсайдер Николо Скира ўзининг ижтимоий тармоқдаги саҳифасида маълум қилди.
Манбага кўра, “Реал” 24 ёшли бразилиялик футболчи сотишга рози, бироқ унинг учун 120–130 миллион евро атрофида товон пули сўрамоқда.
Родриго жорий йилда АҚШда ўтказилган Клублар ўртасидаги Жаҳон чемпионати давомида бор-йўғи 92 дақиқа ўйнаб, 1 голли узатма амалга оширган. Мадридликлар бош мураббийи Хаби Алонсо ундан захира футболчиси сифатида фойдаланмоқда. Футболчи бу ҳолатдан норози бўлиб, клубдан кетишни истамоқда.
Ҳозирда унга бир нечта жамоалар, хусусан, Англия Премьер Лигасининг “Манчестер Сити”, “Арсенал” ва “Ливерпуль” клублари қизиқиш билдирмоқда. Шунингдек, Саудия Арабистонининг “Ал-Ҳилол” ҳамда Франциянинг “ПСЖ” клублари ҳам Родригонинг атрофидаги вазиятни кузатиб турибди.
Маълумот учун, Родриго 2024/25 йилги мавсумда барча мусобақалар доирасидаги 50 та ўйинда майдонга тушиб, ўз ҳисобига 13 та гол ва 9 та ассист ёздириб қўйган. Унинг клуб билан амалдаги шартномаси 2028 йилнинг ёзигача мўлжалланган. Transfermarkt портали футболчининг қийматини 90 миллион еврога баҳоламоқда.
Изоҳ (0)