Спорт оламининг чинакам афсонаси, ўзбек гимнастикасининг фахри — Оксана Чусовитина 50 ёшни қаршилади. Саккиз марта ёзги Олимпия ўйинларида иштирок этиб, Гиннеслари рекорди китобига киритилган ушбу гимнастикачи 1975 йилнинг 19 июнида Бухоро вилоятида туғилган.
У 1991 йилдан бошлаб халқаро спорт майдонларида собиқ СССР таркибида иштирок этишни бошлаган. 1992 йилда Барселонада бўлиб ўтган Олимпиадада МДҲ номидан қатнашиб, жамоавий баҳсларда олтин медал қўлга киритган. Ўшанда у атиги 17 ёшда эди.
Чидамлилик, фидойилик ва садоқат тимсоли
Чусовитинанинг спортдаги узоқ фаолияти — нафақат жисмоний тайёргарлик, балки мустаҳкам иродаси, меҳнатсеварлиги ва спортга бўлган чексиз муҳаббати натижасидир. У фаолияти давомида Ўзбекистон, Германия ва СССР терма жамоалари сафида қатнашиб, кўплаб медалларни қўлга киритган. Унинг ноёб сакраш техникаси, аниқлиги ва нафис ҳаракатлари бугунги кунда ҳам ёш спортчилар учун ибрат бўлиб қолмоқда.
У 2000 йил Сидней Олимпиадасидан кейин спорт фаолиятини якунлаши мумкин эди. Чунинг Оксананинг ўғли Алишерга лейкемия (оққон) ташхиси қўйилади. 2002 йилда уни даволаш мақсадида Германияга кўчиб ўтади. Унинг турмуш ўртоғи, юнон-рум кураши бўйича чемпион Баҳодир Қурбонов эса спортдаги фаолиятини тўхтатади.
Алишернинг даволанишига “Кёльн” спорт клуби ёрдам қўлини чўзади. Оксана Германияда машғулотларни давом эттиради ва 2008 йилги Пекин Олимпиадасида Германия терма жамоаси сафида кумуш медал қўлга киритади.
Ўша даврни эслаб, Оксана шундай дейди:
“Алишер ўшанда атиги 3 ёшда эди. Касаллик қаердан чиққани номаълум. Кўпчилик ўғлимни даволатиш учун машғулотларни давом эттирдим деб ўйлайди. Аслида эса мен спорт билан шуғулланмасам, руҳий жиҳатдан чидаб бўлмасди. Шифохонадаги болалар кўзларига қараш оғир эди. Спорт мени бир оз бўлса-да чалғитди.”
Жароҳатлар, қайтишлар ва янги умидлар
2008 йилдан кейин Оксана бир неча оғир жароҳат олди, операциялар ўтказди, лекин спортни тарк этмади. 2012 йил Лондонда, 2016 йил Рио-де-Жанейрода, 2021 йил Токиода бўлиб ўтган Олимпиадаларда қатнашди. Токио Олимпиадасига йўлланмани 45 ёшида қўлга киритиб, яна бир тарих яратди.
“Бу қандай сир?” деган саволларга Оксана оддий жавоб беради:
“Ҳеч қандай сир йўқ. Ҳеч ким бу қадар узоқ вақт давомида гимнастикада қолишни хоҳламаган, холос. Мен ҳар куни ўзимга мақсад қўяман. Мени ҳеч ким мажбурламайди. Бу — чин дилдан бўлган қизиқиш.”
2024 йилнинг май ойида Тошкентда бўлиб ўтган саралаш мусобақалари олдидан жароҳат олиб, Париж Олимпиадасида иштирок эта олмайдиган бўлди. Оксана бу ҳолатни афсус билан тилга олди:
“Жуда катта тайёргарлик кўргандим, ўзимга ишонгандим. Афсуски, жароҳат мени тўхтатди.”
Лос-Анжелес сари!
Чусовитина 2028 йилда АҚШнинг Лос-Анжелес шаҳрида бўлиб ўтадиган Олимпия ўйинларида қатнашишни ният қилган. 2023 йил кузида Россияда ўтган мусобақада ғолиб бўлиб, бу мақсад сари яна бир қадам ташлади:
“Авваламбор, 2026 йил Осиё ўйинларида иштирок этишни истайман. Кейин ҳолатимга қараб қарор қиламан. Агар ўзимни яхши ҳис қилсам, Олимпиадага йўлланма олиш учун ҳаракат қиламан.”
Мукофот ва эътирофлар
Бугунги кунда Оксана Чусовитина — Ўзбекистон Республикасида хизмат кўрсатган спорт устаси, “Меҳнат шуҳрати” ва “Эл-юрт ҳурмати” орденлари соҳиби, “Ўзбекистон ифтихори” фахрий унвони билан тақдирланган.
Статистика ва ютуқлар
- 1992 йил — Олимпия чемпиони (МДҲ таркибида)
- 2008 йил — Олимпия ўйинлари вице-чемпиони (Германия)
- 3 карра жаҳон чемпиони
- 8 карра Олимпия иштирокчиси — Гиннес рекордчиси
- Европа чемпионати ғолиби (2008)
- Жаҳон чемпионатларида 8 та кумуш ва бронза медали
- Жаҳон кубоги ғолиби (2022 йил, таяниб сакраш).
50 ёшда бўлишига қарамай, Оксана Чусовитина спортга бўлган муҳаббат, фидойилик ва чидамлиликнинг тирик тимсолидир. У нафақат ўзбек спортининг фахри, балки бутун дунё спорти тарихида ўчмас из қолдирган афсонадир.
Изоҳ (0)