Испаниянинг Мадрид шаҳри 2030 йилда бўлиб ўтадиган футбол бўйича Жаҳон чемпионати финал учрашувига мезбонлик қилиши мумкин. Marca нашрининг ёзишича, “Сантиаго Бернабеу” стадиони финал ўйини учун асосий номзод сифатида танланган ва бу борада FIFA ҳамда “Реал Мадрид” ўртасида келишувга эришилган. Бу расмий тарзда эълон қилинмаган бўлса-да, вазиятдан хабардор манбалар битим аллақачон имзолангани ҳақида хабар бермоқда.
2030 йилги мундиал тарихий аҳамият касб этади — турнир Испания, Португалия ва Марокаш томонидан биргаликда ташкил этилади. Испаниянинг А-Коруня, Барселона, Бильбао, Лас-Палмас, Мадрид, Малага, Сан-Себастьян, Севилья ва Сарагоса каби шаҳарларига мезбонлик ҳуқуқи берилган. Бироқ финал учрашуви айнан қайси аренада ўтиши борасида ҳозиргача расмий қарор мавжуд эмас эди.
FIFA ва “Реал Мадрид” ўртасидаги кўп йиллик ижобий ҳамкорлик ушбу қарорнинг қабул қилинишида муҳим омил бўлди. Бугунги кунда тўлиқ модернизациядан ўтган “Сантиаго Бернабеу” стадиони йирик халқаро учрашувлар ва тадбирларни ўтказиш учун тўлиқ тайёр бўлиб, унинг инфратузилмаси FIFA талабларига тўла жавоб беради.
Аввалроқ “Барселона” клуби ҳам ўзининг янгиланган “Камп Ноу” стадионида финални ўтказиш таклифи билан чиққан эди. Клуб вице-президенти Елена Форт бу борада шундай деган:
Ҳамма ўз имкониятидан фойдаланишга ҳақли. Шу боис “Камп Ноу” ҳам Жаҳон чемпионати финалини ўтказишга лойиқ стадион.
Бироқ “Камп Ноу” реконструкцияси лойиҳасида юзага келган кечикишлар ва ноаниқликлар туфайли “Барселона”нинг аризаси эътиборсиз қолдирилган.
FIFA учун ишончли инфратузилма ва тўлиқ тайёргарлик даражаси асосий мезонлардан бири ҳисобланади. Шу боис, 2030 йилги Жаҳон чемпионатининг энг муҳим ўйини — финал учрашуви Мадрид марказида жойлашган замонавий ва тайёр “Сантиаго Бернабеу” стадионида ўтказилиши кутилмоқда.
Изоҳ (0)