Ўзбекистон терма жамоаси Жаҳон чемпионати саралашининг сўнгги турида Қатарни 3:0 ҳисобида мағлуб этди. Тошкентдаги “Бунёдкор” стадионида бўлиб ўтган баҳсда Азизбек Турғунбоев, Элдор Шомуродов ва Игор Сергеев рақиб дарвозасини ишғол қилди.
Sofascore портали ўйиндан кейин футболчиларнинг майдондаги ҳаракатини баҳолади. Унга кўра, захирадан майдонга тушиб, иккита ассист муаллифига айланган Жамшид Искандеров учрашувнинг энг яхши футболчиси деб эътироф этилди — 8,1 балл.
Ярим ҳимоячи 62-дақиқада Азизбек Турғунбоевнинг ўрнига майдонга тушиб, Элдор Шомуродов ҳамда Игор Сергеевнинг голларига ҳаммуаллифлик қилди. Шунингдек, у 28 дақиқа ичида 16 марта тўпга тегди. Шерикларига 10 та пас бериб, уларнинг 8 таси аниқ манзилга етиб борди — 80 фоиз. Қолаверса, Искандеров икки марта калит узатма амалга оширди.
Портал талқинига кўра, учрашувнинг энг яхши иккинчи футболчиси Жалолиддин Машарипов ҳисобланади. У баҳсни асосий таркибда бошлади, 84-дақиқада захирага олинди. Машарипов ушбу вақт давомида 61 марта тўпга тегинган. Вингер 41 марта узатма амалга ошириб, уларнинг 34 таси шерикларига аниқ етиб борган — 83 фоиз. Шунингдек, у 5 марта калит узатма амалга оширган ва 7 марта майдонда тўп учун кураш олиб бориб, 5 тасида ғалаба қозонган.
Кейинги ўринларда Ўзбекистоннинг биринчи голи муаллифи Азизбек Турғунбоев қайд этилган. Футболчининг ҳаракатлари Sofascore томонидан 7,6 баллга лойиқ кўрилган. Игор Сергеев — 7,5, Элдор Шомуродов — 7,2, Аббосбек Файзуллаев эса 7,1 балл билан баҳоланган.
Ўзбекистон терма жамоаси сафида энг ёмон баҳо олган футболчи Ҳожимат Эркинов бўлди — 6,4. Аммо шуни ҳам таъкидлаш керакки, Эркинов 84-дақиқада захирадан майдонга тушди. Шунингдек, Абдурауф Бўриев — 6,6, Ўткир Юсупов — 6,7, Шерзод Насруллаев — 6,7 балл билан баҳоланган.
Қатар терма жамоаси сафида энг юқори балл олган футболчи Абдулла Юсуф ҳисобланади. Ўнг қанот ҳимоячиси позициясида ҳаракат қиладиган Абдулла Sofascore томонидан 7,0 баллга лойиқ кўрилган. Энг ёмон ҳаракат қилган футболчи эса Муҳаммад Носир ҳисобланади — 6,2 балл.
Изоҳ (0)