Қозоғистон терма жамоаси кузда принципиал рақиблардан бири билан ўртоқлик учрашуви ўтказиши мумкин. Бу ҳақда Вести.кз нашри ўз манбаларига таяниб хабар берди.
Маълум қилинишича, Қозоғистон футбол федерацияси (ҚФФ) Ўзбекистон терма жамоаси билан ўртоқлик ўйини ташкил этиш бўйича музокара олиб бормоқда.
Учрашув FIFA кунлари доирасида, ноябрь ойида ўтказилиши кутилмоқда. 15 ноябрь куни Қозоғистон терма жамоаси ЖЧ-2026 саралаш босқичидаги сўнгги ўйинини Бельгияга қарши ўтказади. Шундан сўнг жамоа учун бўш кун пайдо бўлади. Ўзбекистон эса саралаш доирасидаги охирги ўйинини 10 июнь куни Қатарга қарши ўтказади.
Қозоғистон ва Ўзбекистон терма жамоалари охирги марта 2022 йил 16 ноябрь куни Тошкентда ўзаро баҳс олиб борган эди. Ўшанда Ўзбекистон 2:0 ҳисобида ғалаба қозонган.
Таъкидлаш жоиз, Ўзбекистон терма жамоаси тарихда илк бор жаҳон чемпионатининг финал босқичига чиқишга жуда яқин турибди. Жамоа 17 очко билан саралаш гуруҳининг иккинчи поғонасида бормоқда. Яна бир очко Темур Кападзе жамоасига мундиал йўлланмасини кафолатлайди. Ўзбекистон саралаш босқичи якунига қадар яна иккита учрашув ўтказади: 5 июнь куни сафарда БААга қарши, 10 июнь куни эса ўз майдонида Қатарга қарши.
Эслатиб ўтамиз, Қозоғистон терма жамоаси бош мураббийи вазифасини бажарувчи Али Алиев жамоаси Осиё футбол конфедерациясига аъзо бўлганида, Ўзбекистон каби жаҳон чемпионати йўлланмасини қўлга киритиши мумкинлигини таъкидлаган эди.
Изоҳ (0)