Клублар ўртасидаги Жаҳон чемпионати якунланганидан кейин “Реал Мадрид” президенти Флорентино Перес ва жамоа бош мураббийи Хаби Алонсо ўртасида учрашув бўлиб ўтди. Бу ҳақда Испаниянинг Sport.es нашри хабар берди.
Манбага кўра, учрашув давомида Перес жамоанинг мундиалдаги натижаларидан норозилигини билдирган. Айниқса, марказий таянч зонасидаги ўйин сифати кўпчиликнинг эътирозига сабаб бўлган.
Шу сабабли, клуб раҳбарияти ва мураббийлар штаби ўртасида янги таянч ярим ҳимоячиси трансфери борасида келишмовчилик вужудга келган. Флорентино Перес фақат “Манчестер Сити” футболчиси Родри каби юқори даражадаги футболчи учун маблағ ажратишга тайёр. Аммо ҳозирги шароитда бундай катта трансферни амалга ошириш осон эмас.
Бош мураббий Хаби Алонсо эса бир оз бошқача ёндашув тарафдори — у “Штутгарт”дан Анхело Штиллер, “Интер”дан Николо Барелла ва Нидерландиянинг “АЗ Алкмар” клуби аъзоси Кес Смит номзодларини илгари сурган. Бироқ Перес бу футболчиларни “Реал Мадрид” даражасидаги ўйинчилар деб ҳисобламаяпти.
Айни пайтда клуб спорт директорлари ва мураббийлар штаби ҳар икки томоннинг талабларига жавоб берадиган, жамоанинг эҳтиёжларига мос келувчи футболчини излашни давом эттирмоқда. Бироқ бу масала ҳали ҳам очиқ қолмоқда.
Изоҳ (0)