Россияда 1 июлдан бошлаб Ягона биометрик тизимда рўйхатдан ўтмаган чет эл фуқаролари мобил алоқадан узилади. Бу ҳақда Рақамли ривожланиш вазирлиги хабар берди.
2025 йилдан бошлаб хорижликлар алоқа оператори билан фақат биометрик маълумотларни топширган тақдирда шартнома тузиши мумкин. Улар ўз номларига 10 тагача SIM-карта расмийлаштира олади. Шартномани аввалроқ тузганлар 1 июлгача биометрик маълумот топшириши керак эди.
Уч ойдан ортиқ вақт давомида фаол бўлмаган хорижликларнинг телефон рақамлари дарҳол ўчирилади, дея маълум қилди вазирлик.
Фаол рақамлар босқичма-босқич ўчирилади. Дастлаб хорижликлар учун халқаро ва шаҳарлараро алоқа хизматлари блокланади. Бундан ташқари, уларнинг интернетга кириш тезлиги пасайтирилади, 30 кундан кейин эса операторлар хизмат кўрсатишни бутунлай тўхтатади.
Вазирликка кўра, ҳозиргача икки миллиондан ортиқ хорижлик Ягона биометрик тизимда рўйхатдан ўтган ва янги тартиб бўйича алоқа шартномаларини расмийлаштирган. Россия ҳукумати 2024 йилда хорижликлар томонидан SIM-карта сотиб олиш қоидаларини кучайтириш таклифи билан чиққанди. Рақамли технологиялар вазирлиги бу “кулранг” SIM-карталарга қарши курашиш учун зарурлигини тушунтирган.
Изоҳ (0)