Россияда мигрантлар номига биттадан ортиқ SIM-картани расмийлаштиришни тақиқлаш таклиф этилмоқда, деб хабар берди “ТАСС”.
Бу кўзда тутилган қонун лойиҳаси Россия Давлат думасининг Меҳнат, ижтимоий сиёсат ва фахрийлар ишлари бўйича қўмитаси раиси Ярослав Нилов томонидан ишлаб чиқилди. Депутат фикрича, бундай чеклов мамлакатда хавфсизлик даражасини ошириш, коммуникациялар устидан назоратни таъминлаш ва миллий манфаатларни ҳимоя қилишга хизмат қилади.
Унинг сўзларига кўра, “Терроризм, жосуслик, фирибгарлик, кибертаҳдидлар билан боғлиқ хатарлар кучайиб бораётганини инобатга олиб, мамлакатда чет элликлар ва фуқаролиги бўлмаган шахсларнинг Россияда SIM-карталарга эгалик қилишини чеклаш чораларини кўриш зарур”.
Мамлакатда 2025 йил 1 январдан бошлаб мигрантларга ўз номларига 10 тадан ортиқ SIM-карта олишни тақиқловчи тартиб кучга кирган. Хорижий фуқаролар ва фуқаролиги бўлмаган шахслар алоқа операторлари билан фақат шахсини тасдиқловчи ҳужжатни кўрсатган ҳолда ва биометрик маълумотлардан мажбурий фойдаланган ҳолда идораларга шахсан келиб шартномалар тузиши мумкин.
Депутат Ярослав Нилов Россия мактабларида ўқиш учун рус тили имтиҳонидан уч марта ўта олмаган мигрантларнинг фарзандларини ватанига қайтариб юборишни ҳам таклиф қилганди. Россия Давлат думасида мигрант аёллар учун бепул туғуруқни тақиқлаш ҳам таклиф қилинган.
Изоҳ (0)