Россия Федерацияси коммунистик партияси раҳбарияти Ханти-Манси автоном округи думаси депутати Холид Таги-Заденинг партия аъзолигидан чиқарилгани, аммо мандати ва округ думасидаги фракцияси аъзолигини сақлаб қолганини билдирди.
РФКП Марказий қўмитаси раиси ўринбосари Юрий Афонинг айтишича, партиядан ажралиб чиққан шахсга Югра коммунистлари таъсир ўтказа олмайди.
“У бир неча йил олдин партия ахлоқи ва интизомини бузгани учун РФКП сафидан чиқарилган. Биз уни бошқа номзод сифатида кўрсатмаймиз. Ва бу унинг минтақавий бўлим нуқтайи назарига мос келмайдиган шахсий фикри”, деди Юрий Афонинг.
Давлат Думаси депутати Михаил Матвеев эса янада кескинроқ фикр билдирган.
“Провокатор партиядан чиқариб юборилган ва унинг аҳмоқона баёнотлари партияга ҳеч қандай алоқаси йўқ. Таги-Заде буни бежиз айтмаганини ҳисобга олсак - парламент аъзолари орасида маҳаллий халқларнинг туғилиши ва ўлими ҳақида мунозара бошланганди. Бу бутун Россияга ҳужум, маҳаллий аҳолини муҳожирлар билан алмаштиришни оқлашдир. Ўзбекларнинг бизнинг еримизга бўлган “тарихий ҳуқуқлари”ни асослашнинг ўзи ҳам кимдир ишлаб чиққан қўлланмани эслатади. ФСБ бу “яширин сепаратист”га эътибор қаратиши керак эди”, деб ёзади Миҳаил Матвеев ўзининг Telegram каналида.
Бир нечта манбаларнинг маҳаллий ОАВга маълум қилишича, Холид Таги-Зода округ парламенти мажлисидаги можарода “ўзбеклар тарихий ватани Юграга қайтиши мумкин” деган гапидан сўнг минтақадан шошилинч жўнаб кетган бўлиши мумкин.. Сиёсий доиралардаги бир қатор манбаларнинг фикрича, депутат Озарбайжонга кетган.
“Таги-Заде Россия ҳудудини тарк этгани ҳақида маълумот тарқалди. Айтишларича, у таътилга ўзининг тарихий ватани Озарбайжонга жўнаб кетган”, дейди манба.
“Бироқ, янгилик эълон қилинган пайтда буни тасдиқлаш имкони бўлмади. Таги-Заде 29 май куни Дума мажлиси ўтказилганидан бери журналистларнинг қўнғироқларига жавоб бермаяпти. 2 июнь куни унинг сўзларини кўриб чиққан ахлоқ комиссияси йиғилишида ҳам иштирок этмаган”, дея ёзмоқда ura.ru сайти.
30 май куни ижтимоий тармоқларда Россия Федерацияси коммунистик партиясидан сайланган Ханти-Манси автоном округи думаси депутати парламент йиғилишида округни “ўзбекларнинг тарихий ватани” сифатида кўриш мумкинлигини билдиргани ҳақида видеолар тарқалди.
Маълум қилинишича, Ханти-Манси автоном округи думаси мажлисида парламент аъзолари ўртасида маҳаллий халқларнинг туғилиши ва ўлими ҳақида мунозара юз берган. Россия Федерацияси коммунистик партиясидан сайланган депутат Холид Таги-Заде ўзбекистонлик муҳожирлар ХММОга “ўзларининг тарихий ватанига” қайтаётганини айтиб, ҳамкасбларига Сибир хонлиги тарихини эслатган.
“Мигрантлар ҳам турли хил бўлади. Масалан, ўзбекларга келсак: Югра ва Тюмен вилоятининг бир қисми тарихан Сибир хонлиги эди. Маълумки, Кўчимхон сўнгги ҳукмдор бўлган. У эса шайбонийлар сулоласига мансуб. Мана шу шайбонийлар сулоласи — Бухоро хонлигидан чиққан ҳукмрон ўзбек сулоласи ҳисобланади. Эҳтимол, муҳожирлар бу ерга ўзларининг тарихий ватанига келаётгандек келишаётгандир?”, деди депутат мажлис давомида.
Дума раиси бунга жавобан Таги-Заденинг яна бир муҳимроқ масалага қайтишини сўраган.
Изоҳ (0)