Чеченистон раҳбари Рамзан Қодировнинг 17 ёшли ўғли Адам Қодиров 28 июнь куни уйланди. Бу ҳақда “Кавказ.Реалии” хабар берди.
Маълум қилинишича, тўй Қодировлар оиласининг ота қишлоғи Ахмат-Юртда (собиқ Сенторой) бўлиб ўтган. Келин Рамзан Қодировнинг энг яқин сафдоши, давлат думаси депутати Адам Делимхоновнинг набираси ҳисобланади. Адамнинг опаси Айшат Қодирова қизнинг исмини ошкор қилган, унинг исми Медни экани маълум. У ҳам юқори мартабали қодировчилар яшайдиган Ахмат-Юрт қишлоғидан.
Тўй куни республикада йўллар ёпилиб, хавфсизлик чоралари кучайтирилган. Кортежни кузатиб боришга Чеченистоннинг барча туманларидан ЙҲХБ ходимлари жалб этилган. Адам Қодировнинг уйланиш фактини унинг отаси тасдиқлаган.
Рамзан Қодиров ўзининг Telegram каналида ўғлини тўйидан олдин шахсан Россия президенти Владимир Путин табриклагани ҳақида пост қолдирган.
Ҳурматли Владимир Владимирович! Чеченистон биринчи президенти, Россия қаҳрамони Аҳмад-Ҳожи Қодировнинг набираси Адам Қодировни оилавий ҳаётга қадам қўйгани билан шахсан табриклаганингиз учун бутун оиламиз номидан сизга чуқур миннатдорлик билдирмоқчиман, деб ёзган Қодиров.
Шунингдек, “ВЧК-ОГПУ” Telegram каналида кичик Қодировнинг тўйидан олинган суратлар эълон қилинган. Тўй вақтида Адам Қодировнинг қўлида Jacob & Co.Billionaire ASHOKA соати бўлганини кўриш мумкин. У 320 та бриллиант билан безатилган, қиймати эса 27,7 млн долларни ташкил этади.
Россия Оила кодексининг 13-моддасига кўра, никоҳга кириш ёши 18 ёш этиб белгиланган. Бироқ асосли сабаблар бўлса, яшаш жойидаги маҳаллий ўзини ўзи бошқариш органлари 16 ёшга тўлган шахсларга уларнинг илтимосига биноан турмуш қуришга рухсат бериши мумкин.
Изоҳ (0)