Озарбайжон Россия бош вазири ўринбосари Алексей Оверчукни қабул қилишдан бош тортди. Бу ҳақда манбаларга таяниб, Minval хабар берди.
Маълум қилинишича, Россия ҳукумати раиси ўринбосарининг июнь ойи охирига режалаштирилган ташрифи бекор қилинган. Бу Екатеринбургда 50 дан ортиқ озарбайжонлик қўлга олингани, уларга қарши “судсиз ва терговсиз содир этилган этник асосдаги зўравонлик” билан боғлиқ экани айтилмоқда.
Худди шу сабабга кўра Озарбайжонда Россиянинг барча маданий тадбирларини ўтказиш бекор қилинган. Бу концертлар, фестиваллар, спектакллар, кўргазмалар ва бошқа тадбирларга тааллуқли.
Ўз навбатида, Озарбайжон Миллий Мажлиси ўз делегациясининг Москвага ташрифини ҳам бекор қилган. Миллий Мажлис раиси биринчи ўринбосари Али Аҳмедов бошчилигидаги делегация Россия билан ҳамкорлик бўйича парламентлараро комиссиянинг 23-йиғилишига Москвага бормайди.
27 июнь куни Екатеринбургда 50 дан ортиқ озарбайжонлик қўлга олинди. Маҳаллий ОАВнинг ёзишича, ҳибсга олишлар 2001 йилда озарбайжонлик Юнус Пашаевнинг ўлдирилиши бўйича очилмаган жиноий иш, шунингдек, 2010—2011 йилларда содир этилган яна иккита жиноят билан боғлиқ.
Ушбу иш бўйича асосий гумондорлар бўлган ака-ука Гусейн ва Зиёддин Сафаровлар ҳибсга олинаётган пайтда вафот этган. E1.ru нашри манбасига кўра, улардан бирининг юрагида муаммолар кузатилган ва вафот этган. Иккинчисида ҳам, “худди шундай вазият” кузатилгани айтилмоқда.
Озарбайжон Ташқи ишлар вазирлиги 27 июнь куни Россия хавфсизлик кучлари томонидан ўтказилган рейдлар муносабати билан Россиянинг мамлакатдаги элчихонаси муваққат ишлар вакили Пётр Волоковични чақиртирган.
Изоҳ (0)