Афғонистон терма жамоаси Россия билан ўртоқлик учрашуви ўтказиши мумкин. Бу ҳақда Бомбардир нашри хабар берди.
Афғонистон футбол федерацияси матбуот котиби Мустафо Ҳошимийнинг маълум қилишича, мамлакат миллий терма жамоаси Россия билан ўртоқлик учрашуви ўтказишга тайёр:
Бизнинг делегациямиз яқинда Россияда бўлди ва Афғонистон спорт вазирлиги вакиллари Россия спорт вазири билан музокаралар ўтказди. Миллий терма жамоалар ўртасида ўртоқлик учрашуви ўтказиш ғояси — ажойиб. Биз Россия давлатига самимий муносабатдамиз. Қолаверса, бош мураббийимиз Винчензо Альберто Аннесе жанобларининг турмуш ўртоғи россиялик, — деди Ҳошимий.
Унинг сўзларига кўра, ўртоқлик учрашуви ташкилий жиҳатдан ҳали муҳокама босқичида:
Бизнинг жамоа ўйнашга тайёр, бироқ бу масалани ҳар икки мамлакат футбол федерацияси раҳбарлари муҳокама қилиши лозим. Шундан сўнг ўйин санаси ва жойи белгиланади. Шунингдек, бу борада бош мураббий билан ҳам келишувга эришиш керак. Агар Россия рақиб излаётган бўлса ва Афғонистонга қарши баҳс ўтказишга тайёр бўлса, биз бу таклифни кўриб чиқамиз, — деди у.
Маълумот ўрнида, Афғонистон миллий терма жамоаси FIFA рейтингида 160-ўринни эгаллаб турибди. Улар сўнгги учрашувини Осиё Кубоги саралаши доирасида Сурияга қарши ўтказиб, 0:1 ҳисобида имкониятни бой берган.
Изоҳ (0)