Озарбайжонда Россия давлат ва хусусий ташкилотлари иштирокида ўтказилиши режалаштирилган барча маданий тадбирлар бекор қилинди. Бу ҳақда Озарбайжон Маданият вазирлигига таяниб, “Азертаж” давлат ахборот агентлиги хабар берди.
Маълум қилинишича, бу концертлар, фестиваллар, спектакллар, кўргазмалар ва бошқа тадбирларга тааллуқли. Қарор “Россия ҳуқуқ-тартибот идоралари томонидан этник келиб чиқиши бўйича Екатеринбургда озарбайжонликларга нисбатан намойишкорона, мақсадли ва суддан ташқари қотилликлар ҳамда зўравонлик ҳаракатлари содир этилгани муносабати билан” қабул қилинган.
Сўнгги пайтларда бу каби ҳолатлар тизимли тус олмоқда, дейилади хабарда.
27 июнь куни Екатеринбургда 50 дан ортиқ озарбайжонлик қўлга олинди. Маҳаллий ОАВнинг ёзишича, ҳибсга олишлар 2001 йилда озарбайжонлик Юнус Пашаевнинг ўлдирилиши бўйича очилмаган жиноий иш, шунингдек, 2010—2011 йилларда содир этилган яна иккита жиноят билан боғлиқ.
Ушбу иш бўйича асосий гумондорлар бўлган ака-ука Гусейн ва Зиёддин Сафаровлар ҳибсга олинаётган пайтда вафот этган. E1.ru нашри манбасига кўра, улардан бирининг юрагида муаммолар кузатилган ва вафот этган. Иккинчисида ҳам, “худди шундай вазият” кузатилгани айтилмоқда.
Озарбайжон Ташқи ишлар вазирлиги 27 июнь куни Россия хавфсизлик кучлари томонидан ўтказилган рейдлар муносабати билан Россиянинг мамлакатдаги элчихонаси муваққат ишлар вакили Пётр Волоковични чақиртирган.
Россия Ташқи ишлар вазирлиги расмий вакили Мария Захаровага кўра, Волокович “Озарбайжон томонига зарур тушунтиришлар берган” ва “вазият ҳуқуқ-тартибот идоралари назорати остида эканига ишонтирган”. 29 июнь куни Екатеринбургнинг Ленин туман суди қотиллик иши бўйича гумон қилинган уч кишини тергов изоляторига юборган. Суд яна уч нафар маҳбусга нисбатан эҳтиёт чорасини танлаши кутилмоқда.
Изоҳ (0)