Туркия ташқи ишлар вазири Хоқон Фидан мамлакат Россия ва Украина ўртасидаги тинчлик музокараларининг учинчи раундини Истанбулда ўтказишга тайёрлигини маълум қилди.
Фидан ўтказилган музокаралар доирасида томонлар қабул қилган қарорларни амалга ошириш муҳимлигини таъкидлаган.
“Учинчи босқични ўтказишнинг муҳимлигига гувоҳ бўлиб турибмиз. Россияликлар ҳам бу масала бўйича баёнот берди. Биз буни қабул қилишга ва воситачилик ролини ўйнашга тайёрмиз. Келинг, урушни тугатишга ҳисса қўшайлик. Бу урушдаги азоб-уқубатларни маълум даражада енгиллаштирайлик, масалан, асирлар, жасадлар, ярадорлар ва болаларни алмашайлик”, деди вазир.
Россиянинг янги музокараларга тайёрлиги айтилганидан кейин Украинанинг бунга муносабати қандай бўлиши ҳақидаги саволга Фидан “томонлар аввалги учрашувда ўз позициялари ҳақида бир-бирини хабардор қилган”ини билдирган.
Вазирнинг таъкидлашича, томонлар ўт очишни тўхтатишни таъминлаш бўйича ўз позициялари ва шартлари ҳақида бир-бирларини аллақачон хабардор қилган. Аммо масала бир неча учрашувда ҳал қилиниши мумкин бўлган даражада оддий эмаслиги айтилган.
“Нафрат бўлган жойда мазмунли ва самарали учрашувлар ўтказиш имкониятини яратиш муҳим. Буларнинг барчасини ташкил этиш ва ўтказиш Туркия ва президентимиз учун дипломатиянинг муҳим қисми саналади”, деб қўшимча қилган Фидан.
Изоҳ (0)