Қримда икки эркак “Украина разведкаси манфаатлари йўлида” ҳарбий техникани сурат ва видеога олишда гумонланиб, ҳибсга олинди. Улар давлатга хиёнатда айбланмоқда.
“Россия Федерал хавфсизлик хизмати Қрим ҳудудида Украина махсус хизматлари манфаатларини кўзлаб минтақадаги муҳим инфратузилма объектлари ва ҳарбий техникаларни суратга ва видеога олган, 1977 ва 1993 йилларда туғилган икки нафар Россия фуқаросини ҳибсга олди”, дейилади ФХХ Жамоат хавфсизлиги маркази баёнотида.
Маълумотларга кўра, қўлга олинганлар Украина хавфсизлик хизмати томонидан Telegram мессенжери орқали ёлланган.
“Қримликлар ўз кураторларининг кўрсатмалари бўйича суратга олинган материалларни кейинчалик хорижий разведка манфаатлари йўлида фойдаланиш учун Украина Telegram ботига юборган”, дея даъво қилинган.
Ҳолат юзасидан Россия Жиноят кодексининг 275-моддаси (давлатга хиёнат) бўйича жиноий иш қўзғатилган. Ҳибсга олинганлар тергов қилинаётгани ва айбига иқрорлик хулосалари олинаётгани айтилмоқда. Ушбу модда бўйича жазо 20 йилгача озодликдан маҳрум қилишни назарда тутади.
“Интернетда провокацияларга йўл қўймаслик учун Россия фуқароларини ҳушёр бўлишга ва иложи бўлса, Telegram ва WhatsApp орқали нотаниш контактлар билан алоқа қилмасликка чақирамиз”, дейилади хавфсизлик хизмати баёнотида.
Изоҳ (0)