Қанча истеъмол қилинса ҳам семиртирмайдиган 15 та фойдали маҳсулот

Аксарият инсонлар ўзини мазали тамаддидан чегараламай вазн йўқотиш мураккаб деб ўйлайди, лекин парҳез тутганда мазали ва фойдали егуликлар билан ўзни сийлаш ҳам мумкин. Табиат инъом этган хилма-хил мева ва сабзавотлар, ўсимликлар ҳамда денгиз маҳсулотлари соғлом турмуш тарзини давом эттиришда ёрдам беради. Қуйида ҳам мазали, ҳам жуда кам калорияли (максимум 100 гача) бўлган 15 хил маҳсулотни кўриб чиқамиз.

Сарсабил

Ушбу маҳсулот сабзавот ва манзарали экин бўлиб, Ўзбекистон табиатида унинг икки тури учрайди. 5 дона катта ҳажмдаги сарсабил умумий миқдорда 20 килокалория озуқавий қийматга эга. Сарсабил турли соуслар билан бирга истеъмол қилинади.

Edamame ловияси

Edamame — бу яшил рангли пишмаган ловия новдасининг бир тури бўлиб, оқсил, Э витамини, клетчатка каби озуқавий моддаларга бой. Тахминан 100 грамм маҳсулотда 63 килокалория: 4,7 грамм оқсил, 6,3 грамм углевод ва 2 грамм ёғ мавжуд. Шарқда уни соя соуси билан бирга истеъмол қилишади, аммо қўшимча соуслар кўпроқ калория беришини унутмаслик лозим.

Денгиз чиғаноқлари

4-5 дона катта ҳажмдаги денгиз чиғаноқлари 89 килокалория озуқавий қийматга эга. Унда 17 грамм оқсил, 2,7 грамм углевод ва 0,9 грамм ёғ мавжуд.

Креветкалар

Қисқичбақасимонларнинг мазкур майда туркуми ҳам жуда кам қувватга эга бўлиб, 100 грамм маҳсулотда 85 килокалория мавжуд: 20 грамм оқсил, 0,5 грамм ёғ ва 0 грамм углевод. Креветкаларни ёғда қовуриш орқали таом калорияси ортишини ҳисобга олиш ёдингиздан кўтарилмасин.

Малина

Барча севиб истеъмол қиладиган ушбу резавор ҳам жуда парҳезбоп. 100 грамм малина 50 калория кучга эга. Унда 1,4 грамм оқсил, 12 грамм углевод ва 0 грамм ёғ бор.

Қулупнай

Қулупнай ҳам деярли калорияси йўқ мевалар сирасига киради. 100 грамм қулупнай энергетик қиймати 36 килокалориядир.

Ананас

100 грамм ананас — тахминан бир пиёла тозаланган ананас бўлаклари таркибида 57 килокалория бор. Консерваланган ва янги узилган ананас энергетик қиймати ва фойдалилик жиҳати бир-биридан фарқ қилади.

Киви

Бир дона катта кивида 61 килокалория бўлиб, унинг таркибида апелсинга нисбатан кўпроқ C витамини мавжуд.

Селдерей

Ўртача нисбатда 2 шох селдерей кўкати таркибида 0,7 грамм оқсил, 3 грамм углевод, 0,2 грамм ёғ — умумий 17 килокалория мавжуд. Мазкур кўкат метаболизмни яхшилаш хусусиятига ҳам эга.

Майда навли сабзи

Бундай турдаги сабзи одатий сабзавотлардан фарқ қилмайди, шунчаки уни истеъмол қилиш қулай ва тозалашни талаб этмайди. 10 дона кичик сабзининг умумий энергетик қиймати 41 килокалориядир.

Қайнатилган тухум

1 дона қайнатилган тухумда 70 килокалория — 12 грамм оқсил, 10 грамм ёғ ва 0 грамм углевод мавжуд.

Қизил ловия

Қизил ловия парҳезшунослар томонидан тез-тез таклиф этиладиган тўйимли маҳсулот ҳисобланади. 100 грамм қизил ловияда 85 килокалория мавжуд.

Юнон йогурти

Пишириш техникаси одатий йогуртдан фарқ қилгани учун жуда кам калорияли маҳсулот саналади. 100 грамм маҳсулот энергетик қиймати 100 килокалориядир (шакар солинмаганда).

Қизил олма

100 грамм қизил олма таркибида 53 килокалория: 12,3 грамм оқсил бўлиб, ёғ ва углевод мавжуд эмас.

Тарвуз

Ушбу полиз маҳсулотини фақат кеч ёз ва куз фаслида ейиш тавсия этилади. 200 грамм тарвуз таркибида 42 килокалория мавжуд.