Туркиянинг TRT телекарадиокомпанояси кўмагида яратилган “Фаластин 36” (“Palestine 36”) фильми 2026 йилда бўлиб ўтадиган 98-сонли “Оскар” мукофотини қўлга киритиш учун Фаластин номидан расмий номзод сифатида танланди.
Фото: Variety
Картина фаластинлик машҳур кинорежиссёр, кўплаб мукофотлар соҳиби Аннемари Ясир томонидан суратга олинган, Усома Баваридий унга продюсерлик қилган.
Фильм таниқли актёрлар, жумладан, Ҳиям Аббос, Комил ал-Баша, Ясмин ал-Масри, Жалол Алтавил, Роберт Арамаё, Солиҳ Бакри, Яфа Бакри, Карим Дауд Анаё, Билли Хоул, Зафер ал-Абидин, Лиам Кеннингем ва Жереми Аёрнс кабилар иштирок этган.
“Фаластин 36” фильми Фаластин халқининг Буюк Британиянинг 30 йиллик мустамлакачилик ҳукмронлигига қарши кўтарилган қўзғолони ҳақида ҳикоя қилади. Сюжетга кўра, воқеалар 1936 йилда бошланади. Ўша даврда қишлоқ аҳолиси мустамлакачилик режимига қарши кураш учун қўзғолонга чиқади.
Бош қаҳрамон Юсуф ҳамма каби порлоқ келажак ҳақида орзу қилади, аммо у нотинч давр гирдобида қолган ёшлардан бири бўлади. Шу пайтда минтақадаги вазият тобора кескин тус олиб, Европадан яҳудий муҳожирлар оқими ортади. Сўнг фаластинликлар бирлашиб, Британиянинг 30 йиллик ҳукмронлигига қарши энг йирик ва энг узоқ давом этган қўзғолонни бошлайди.
Фильм премераси 2025 йил 4–14 сентябрь кунлари бўлиб ўтадиган 50-Торонто халқаро кинофестивали доирасида тақдим этилади.
Бундан аввал режиссёр Аннемари Ясирнинг “Важиб” (Wajib), “Сени кўрганимда” (When I Saw You) ва “Денгиз тузи” (Salt of This Sea) каби фильмлари Фаластинни “Оскар” мукофотида намойиш этган.
Изоҳ (0)