Лос Анжелес округи шерифи Х ижтимоий тармоғида АҚШ ҳужуми муносабати билан Эронга ҳамдардлик билдирди, кейинчалик эса постни ўчириб ташлади. Бу ҳақда CBS News нашри хабар бермоқда.
“Яқинда Эронда содир бўлган портлашлар оқибатида ҳалок бўлганлар ва жабрланганларнинг оилаларига ҳамдардлик билдирамиз. Ушбу фожиали воқеа чет элда содир бўлган бўлса-да, Лос Анжелес округи шерифи департаменти маҳаллий, штат ва федерал ҳамкорларимиз билан биргаликда вазиятни синчковлик билан кузатиб бормоқда”, дейилди постнинг асл нусхасида.
Порталнинг маълум қилинишича, пост дарҳол таҳрирланган, ундан эронлик оилалар ва қурбонлар ҳақидаги маълумотлар олиб ташланган, шунингдек, улар “чет элдаги вазиятни диққат билан кузатаётгани” қайд этилган. Кейинчалик эса пост бутунлай ўчириб ташланган.
Пост олиб ташланганидан сўнг шериф департаменти зудлик билан навбатдаги баёнот эълон қилиб, узр сўраган. Хабарда таъкидланишича, аввалги нашр “ноўрин ва ҳақоратли” деб топилган. Бундан ташқари, у раҳбарият ва идоранинг нуқтаи назарини акс эттирмаганлиги қайд этилган.
Шериф Роберт Луна ҳуқуқ-тартибот идоралари ташқи сиёсат ва ҳарбий ҳаракатлар бўйича изоҳ беришдан тийилишини билдирган. Округ шерифи идораси баҳсли хабарни эълон қилиш ҳолатларини аниқлаш бўйича ички текширувлар бошланганини маълум қилган.
“Аввалроқ Х ижтимоий тармоғида эълон қилинган баёнотда Эрондаги бомбардимон қурбонлари ва жабрланганларнинг оилаларига ҳамдардлик билдирилган эди. Дастлаб департамент постни таҳрирлаб, матндан АҚШ зарбалари ҳақидаги эслатмани олиб ташлаган, шундан сўнг пост платформадан бутунлай ўчириб ташланган.
Департамент Эрон халқига ҳамдардлик билдирилган дастлабки хабардан бехабар эди. Лос Анжелес АҚШнинг энг гавжум округи”, деди шериф департаменти вакили шошилинч берилган баёнотда.
22 июнга ўтар кечаси Америка раҳбари Дональд Трамп АҚШ ҳарбий-ҳаво кучлари Эроннинг учта ядровий объектига ҳужум қилганини маълум қилди. Асосий нишон Фордо — уранни бойитиш заводи бўлди. Трампнинг айтишича, Эроннинг уранни бойитиш бўйича асосий объектлари “бутунлай ва тўлиқ йўқ қилинган”. Эрон эса Фордо заводига фақат қисман зарар етганини таъкидламоқда.
Изоҳ (0)