Жанубий Кореянинг собиқ президенти Юн Сок Ёлнинг рафиқаси Ким Кон Хи 6 август куни коррупция айбловлари бўйича сўроқ қилинмоқда. Бу ҳақда маҳаллий ОАВга таяниб, Associated Press хабар берди.
Маълум қилинишича, сўроқ Сеулда янги либераллар ҳукумати томонидан ўтказилаётган 3 та махсус терговдан бири доирасида амалга оширилмоқда. Терговда собиқ президентнинг рафиқаси акцияларнинг нархини манипуляция қилиш, пора олиш ва партия номзодларини танлаш жараёнига ноқонуний аралашишда гумон қилинмоқда. Ким Кон Хи журналистларга шундай интервью берди:
“Мен арзимас одам бўлиб туриб, халқни ташвишга солганим учун узр сўрайман”.
Сўроқ пайтида Сеулдаги прокурор идораси олдида Юннинг ўнлаб тарафдорлари Жанубий Корея ва АҚШ байроқлари билан тўпланиб, уни қўллаб-қувватлаб турган.
Собиқ президент Юн Сок Ёл апрель ойида мамлакатда ножоиз ҳарбий ҳолат жорий этгани сабаб президентлик лавозимидан четлатилиб, қамоққа олинган эди. У март ойида озод этилган бўлса-да, далилларни йўқ қилишга уринганлиги туфайли июль ойида яна қайта ҳибсга олинган. Ҳозирда у исён кўтарганлик ва бошқа оғир жиноятлар бўйича суд қилинмоқда.
Терговчиларнинг маълум қилишича, ўтган ҳафта собиқ президентни рафиқасининг иши бўйича сўроқ қилишга ҳаракат қилинган, бироқ у қамоқхона формасини ечиб, ич кийимда ерга ётиб олиб, қаршилик кўрсатган. Ҳозирда прокурорлар Юннинг адвокатлари билан музокара олиб бормоқда.
Юн ва унинг рафиқаси 2022 йилги парламент сайловида маълум бир номзодни илгари суриш учун консерватив “Халқ қудрати” партиясига босим ўтказганликда гумон қилинмоқда. Терговга кўра, бу ишда сайлов натижаларини ўрганувчи агентлик асосчиси Мён Те Гюн воситачилик қилган.
Ким Кон Хи, шунингдек, бизнес имтиёзлари билан таъминлаш эвазига черков ходимидан заргарлик буюмларини олиш ва акция нархини манипуляция қилишда гумон қилинмоқда. Президент бўлган даврида Юн бу айбловларни сиёсий ҳужум деб атаб, терговга рухсат бермаган эди.
Эслатиб ўтамиз, 2024 йил 3 декабрь куни Юн тарафидан эълон қилинган ҳарбий ҳолат бир неча соат ичида тугатилган. 14 декабрь куни парламент уни импичмент қилиб, апрель ойида эса Конституциявий суд Юн Сок Ёлни расман лавозимидан четлатган эди.
Июнда бўлиб ўтган муддатдан олдинги президентлик сайловларида либерал номзод Ли Же Мёнг ғалаба қозонган. Шундан кейин, у Юннинг ҳарбий ҳолат жорий қилиши, унинг рафиқасига оид айбловлар ва 2023 йилги сув тошқини чоғида ҳалок бўлган денгиз пиёдаси ишини тергов қилишга буйруқ берган эди.
Изоҳ (0)