Россия Бош штаби генераллари президент Владимир Путинга икки-уч ой ичида Украинанинг фронтдаги мудофааси қулашига ваъда берган. Бу ҳақда Кремлга яқин манбаларга таяниб, Reuters хабар берди.
Манбаларга кўра, Путин ўз армияси жанг майдонида ғалаба қозонаётганига ишонмоқда. Шу сабабли у АҚШ президенти Дональд Трампнинг урушни 8 августга қадар тугатиш талаби рад этилиши эҳтимоли бор. Трамп илгари бу талаб бажарилмаса, Россия билан савдо қиладиган давлатларга санкциялар жорий этишини айтган эди.
Путин Украинанинг тўртта вилояти — Донецк, Луганск, Херсон ва Запороже устидан тўлиқ назорат ўрнатиш режасидан воз кечмаган. Россия президенти 2024 йилнинг кузидан бери рекорд даражадаги ютуқларни олиб келган ёзги ҳужумни тўхтатишдан маъно кўрмаяпти.
Украинадаги DeepState лойиҳаси маълумотларига кўра, Россия армияси июль ойида 564 квадрат километр ҳудудни эгаллаган, бундан бир ой олдин ҳам деярли шунча майдон босиб олинган. Олдинга силжиш суръати 2023 йил ноябридан бери энг юқори даражада бўлди. Ўша вақтда рус қўшинлари минг квадрат километрдан ортиқ ҳудудни назоратга олганди.
АҚШдаги Урушни ўрганиш институти (ISW)нинг Россия бўйича бош эксперти Жорж Баррос фикрича, ҳозирги йўқотишлар шароитида Путин урушни яна 12–16 ой давом эттира олади. У тахминан бир йилдан сўнг Россия бюджет захиралари ҳам, фронт учун етарли “кўнгиллилар” топиш имкониятлари ҳам тугаши мумкинлигини айтди.
Изоҳ (0)