Рақобат қўмитаси инсофсиз рақобатни содир этган Яндекс Маркет рекламаси иши бўйича Uzum Market фойдасига қарор чиқарди. Бу ҳақда қўмита матбуот хизмати хабар берди.
Рақобат қўмитасига Uzum Market МЧЖ ХКдан келиб тушган мурожаат асосида, YandexGо УБ МЧЖ томонидан телевидение ва ижтимоий тармоқлар орқали намойиш этилган Яндекс Маркет рекламаси орқали YandexGо УБ МЧЖ Uzum Market МЧЖ ХКга нисбатан инсофсиз рақобат ҳаракатларини амалга ошириб, “Рақобат тўғрисида”ги қонун талабларини бузаётгани, истеъмолчиларни чалғитаётгани ҳамда Uzum Market МЧЖ ХКнинг ишчанлик обрўсига путур етказаётгани аломатлари бўйича Рақобат қўмитаси махсус комиссияси томонидан 12 июнда иш қўзғатилганди.
Махсус комиссия томонидан ишни кўриб чиқиш натижасида:
- YandexGо УБ МЧЖ рекламасидаги актрисанинг бинафша рангли кўйлаги ва роликнинг дастлабки кадрлари Uzum Market МЧЖ ХКнинг аввалги видеоларидаги образларга визуал ва концептуал жиҳатдан ўхшашлиги;
- реклама ролигидаги бош қаҳрамоннинг узум дастасини кўтариб “а, бу маркетми?!” деб берилган саволидан сўнг, ён-атрофдаги реклама иштирокчиларининг бош қаҳрамоннинг саволига нисбатан салбий ҳолатдаги муносабати (реакцияси);
- реклама ролигида ролик иштирокчисининг “ажойиб маркет” деганидан сўнг, бош қаҳрамоннинг узум дастасини кўтариб “а, бу маркетми?!” деган саволи орқали томошабинда Uzum Market ҳақида сўз бораётгани ҳақида таассурот уйғотилгани. Шундан сўнг, актрисанинг “йўқ, бу бошқа маркет” деган жавоби орқали Яндекс Маркет устунлиги ҳақида ишора қилингани аниқланди.
Юқоридаги ҳолатлар орқали “YandexGо УБ” МЧЖ “Рақобат тўғрисида”ги қонуннинг 21-моддасида назарда тутилган нотўғри таққослаш, яъни рақобатчи хўжалик юритувчи субъектни ёки унинг товарини товарнинг устунлиги ҳақида тасаввур ҳосил қилувчи сўзлардан ёки рамзлардан товарнинг холисона тасдиққа эга бўлган тавсифини ёки таққослаш параметрларини кўрсатмаган ҳолда фойдаланиб таққослашни амалга оширган деб топилган.
Шу билан бирга, Uzum Market томонидан махсус комиссияга рақобатни чеклашга олиб келган ҳаракат бозор иштирокчилари, истеъмолчиларга бевосита моддий зарар етказилгани тўғрисидаги асосли далиллар ва ҳужжатлар тақдим этмагани боис, махсус комиссия ҳолатни иқтисодий жиҳатдан паст таъсирли деб баҳолади ва молиявий санкцияларни суд тартибида қўллашни лозим деб топмади.
Юқорида аниқланган қонунбузилиш ҳолатига мувофиқ, қўмита махсус комиссия томонидан YandexGо УБ МЧЖга нисбатан:
- Яндекс Маркетга оид мазкур реклама ролигини оммавий ахборот воситаларидан олиб ташлаш орқали қонунбузилиш ҳолатини бир ой муддатда бартараф этиш;
- реклама ролигини ОАВдан олиб ташлагани ҳақида тасдиқловчи ҳужжатларни 14 августга қадар қўмитага тақдим этиш бўйича кўрсатма берилди.
Uzum Market МЧЖ матбуот хизматининг “Дарё”га маълум қилишича,вазиятни ҳуқуқий майдонда ҳал қилиш муҳим эди, айнан соғлом рақобат соҳани олдинга силжитади.
“Ўзбекистонда электрон тижорат бозори фаол ривожланмоқда ва биз янги ўйинчиларни мамнуният билан кутиб олмоқдамиз — айнан соғлом рақобат соҳани олдинга силжитади. Шу билан бирга, биз фойдаланувчиларни чалғитмайдиган ҳалол тарғибот усулларига риоя қилишни принципиал жиҳатдан муҳим деб ҳисоблаймиз. Биз учун вазиятни ҳуқуқий майдонда ҳал қилиш муҳим эди ва умид қиламизки, бу ягона ҳолат истисно бўлиб қолади. Пировардида, бозордаги барча компанияларнинг умумий мақсади онлайн харид маданиятини ривожлантириш, инфратузилмани мустаҳкамлаш ҳамда Ўзбекистондаги одамлар турмушини енгиллаштириш ва қулайроқ қилишдан иборат бўлиши лозим”, дейди компания вакили.
Қўмита махсус комиссиянинг ушбу қароридан норози бўлган томон қўмитанинг апелляция кенгашига ёки судга мурожаат қилиш ҳуқуқига эгалигини маълум қилди.
Изоҳ (0)