Индонезия авиакомпанияларига Ўзбекистоннинг барча халқаро аэропортларига парвоз қилиш ҳуқуқи берилди

Ўзбекистон ва Индонезия авиация ҳукуматлари ўртасида янги келишув имзоланди, деб хабар берди Транспорт вазирлиги матбуот хизмати.

Қайд этилишича, президентнинг 2023 йил 11 сентябрдаги фармони билан тасдиқланган “Ўзбекистон — 2030” стратегиясига мувофиқ 2030 йилга қадар авиақатновлар ҳажмини тўрт баробарга ошириш белгиланган. Мазкур топшириқ ижроси доирасида Транспорт вазирлиги делегациясининг навбатдаги учрашуви Индонезиянинг Жакарта шаҳрида бўлиб ўтди. Учрашувда Ўзбекистон ва Индонезия авиация ҳукуматлари ўртасида икки томонлама ҳамкорлик ва ҳаво қатновларини янада ривожлантириш масалалари муҳокама этилди.

Учрашув давомида Индонезия томонига Ўзбекистонда “Зиёрат туризми” ҳамда фуқаро авиация соҳасида амалга оширилаётган кенг кўламли ислоҳотлар ҳақида батафсил маълумот берилди. Шунингдек, Индонезия авиакомпаниялари вакиллари билан ўтказилган алоҳида учрашувларда “Умра плюс” дастурини ривожлантириш билан боғлиқ жиҳатлар кўриб чиқилди.

Музокаралар якунига кўра авиация ҳукуматлари ўртасида тегишли ҳужжатлар имзоланди ва қуйидаги келишувларга эришилди:

• ҳаво қатнови тўғрисидаги икки томонлама битимда авиакомпаниялар сонига қўйилган чекловларни бекор қилиш ва мазкур шартни авиация ҳукуматларининг ваколати асосида кучга киритиш бўйича зудлик билан келишув имзолаш;
• ҳаво қатнови тўғрисидаги икки томонлама битимга киритилган ўзгаришларни эса ўрнатилган тартибда амалдаги қонунчилик талаблари асосида икки давлат ички келишувлар жараёнларини амалга ошириш ёки дипломатик ноталар алмашинуви орқали қабул қилиш, унга қадар парвозларни икки давлат авиация ҳукуматлари ўртасида имзоланган янги келишув доирасида амалга ошириш;
• Ўзбекистон томонидан тайинланган авиакомпаниялар учун битимдаги Жакарта шаҳрига қўшимча равишда аҳоли қатлами зич жойлашган энг йирик туристик ва саноатлашган Денпасар, Сурабая, Медан, Ёгякарта, Мажаленгка, Банда Ацех, Танжунг Пандан, Ломбок ва қўшимча исталган иккита шаҳарларни парвоз манзили этиб белгилаш;
• Индонезия томонидан тайинланган авиакомпаниялари учун Ўзбекистоннинг барча халқаро аэропортларига парвоз қилиш ҳуқуқини бериш;
• “Ўзбекистон ҳаво йўллари” МАК ва Индонезия авиация ҳукумати ўртасида 1995 йилда имзоланган “Келишув” шартларига мувофиқ барча турдаги авиақатновлар учун ҳафтасига 3 марта этиб белгиланган частоталарни янги келишув асосида ҳар бир томон авиакомпаниялари учун 28 тага ошириш (жами 56 та) уларни ярмини йўловчи ва қолган ярмини юк ташиш учун белгилаш;
• барча авиакомпаниялар учун авиақатновларни ҳаво кемасининг йўловчи ва юк сиғими бўйича чекловларсиз парвозларни амалга оширишига рухсат бериш;
• Юқорида қайд этилган авиакомпания ва авиация ҳукумати ўртасида 1995 йилда имзоланган келишувни бекор қилиш ва барча парвозларни янги келишув шартлари асосида амалга ошириш;
• Денпасар йўналишида амалга ошириладиган авиақатновларнинг 50 фоизини Code Share асосида амалга ошириш;
• юк ташиш авиақатновлари учун ҳар икки томон авиакомпанияларига учинчи, тўртинчи ва бешинчи ҳаво эркинликларини бериш;
• келгусида авиақатновлар ҳажмини ошириш ҳамда қўшимча авиакомпанияларни тайинлаш масалаларини ўзаро хат алмашиш йўли билан ҳал этиш.

Вазирлик хабарида таъкидланишича, эришилган келишувлар келгусида икки давлат ўртасида авиақатновларни бажарувчи авиакомпаниялар сонини кўпайтириш, “Умра плюс” дастурини амалга ошириш орқали Зиёрат туризмини ривожлантириш, авиақатновларда ҳар икки томонлама йўловчи ва юк ташиш ҳажмларини ошириш, туристларнинг эркин ҳаракатланиши ҳамда икки томонлама савдо-иқтисодий муносабатларнинг янада ривожланишига катта туртки бўлиб хизмат қилади.