Ғазодаги Ал-Аҳли касалхонасига берилган авиазарба берилиб, бунинг оқибатида 800 дан ортиқ киши қурбон бўлганди. Ўзбекистон бу зўравонлик ҳаракатини кескин қоралади.
“Бу даҳшатли зўравонлик ҳаракатини кескин қоралаймиз ва буни халқаро гуманитар ҳуқуқнинг қўпол бузилиши деб ҳисоблаймиз. Вафот этганларнинг оила аъзолари ва яқинларига чуқур ҳамдардлик билдирган ҳолда, можаро томонларини зудлик билан ҳарбий ҳаракатларни тўхтатишга ҳамда ўт очишдан тийилишга чақирамиз”, — дейилади ТИВ баёнотида.
Исроил армияси 17 октябрь куни кечқурун Ғазо секторининг марказий қисмида жойлашган Ал-Аҳли касалхонасига авиазарба берди. Фаластин томони маълумотларига кўра, 800 дан ортиқ одам ҳалок бўлган. Исроил ҳарбийлари шифохонага ҳужумда Фаластиннинг “Ислом жиҳоди” гуруҳини айбламоқда. Гуруҳ айбловларни рад этди.
Халқаро реакция
Жаҳон етакчиларидан Туркия президенти Ражаб Тоййиб Эрдўғон биринчилардан бўлиб Ғазодаги шифохонага Исроил томонидан авиазарба берилганини қоралаб чиқди ва жаҳон ҳамжамиятини Фаластин анклавидаги “мисли кўрилмаган шафқатсизлик”ни тўхтатишга чақирди.
Пентагон Исроил авиазарбаси тўғрисидаги хабарларга муносабат билдирдириб, “АҚШ Исроилни “уруш қонунлари”га риоя қилишга чақиради”, деб баёнот берди.
Эрон Ташқи ишлар вазирлиги вакили “Ғазо секторидаги касалхонага ҳужум шафқатсизлик билан амалга оширилган жиноят бўлиб, сионистик режим уруш чоғида асосий халқаро принципларга риоя қилмаслигини намойиш этади”, дея баёнот берди.
Иордания қироли Ғазодаги касалхона портлашини “қирғин” ва “ҳарбий жиноят” деб атади.
Изоҳ (0)