Мадриднинг “Реал” клуби ҳужумчи Гонсало Гарсия билан янги шартнома тузишга яқин турибди. Бу ҳақда Marca нашри хабар берди.
Манбаларга кўра, футболчининг амалдаги шартномаси 2027 йил ёзида якунланади. Бироқ томонлар уни узайтириш бўйича тўлиқ келишувга эришган. 21 ёшли ҳужумчи билан янги битим тез орада расман эълон қилиниши кутилмоқда.
Гарсия 2025 йил ёзида АҚШда ўтган Клублар ўртасидаги Жаҳон чемпионатида ёрқин ўйин кўрсатди. У турнир давомида 6 та учрашувда иштирок этиб, 4 та гол ва 1 та голли узатма муаллифига айланган. Шундан сўнг футболчини ўз сафига қўшмоқчи бўлган клублар пайдо бўлди. Хусусан, Англия Премьер Лигаси ва Ла Лиганинг бир нечта жамоалари “Реал”га расмий таклифлар юборган. Аммо “қаймоқранглилар” уни таркибда сақлаб қолишни истади.
Айни пайтда Гарсиянинг жамоада қолиши билан боғлиқ бошқа бир муаммо пайдо бўлган — рақам. У ЖЧда 30-рақам остида ўйнаган эди, бироқ Ла Лига регламентига кўра, футболчилар фақат 1 дан 24 гача бўлган рақамлар билан майдонга тушиши мумкин. Бу шуни англатадики, Гарсия катта эҳтимол билан Килиан Мбаппедан бўшаган 9-рақам остида ўйнаши мумкин.
Эслатиб ўтамиз, “Реал Мадрид” янги мавсумдаги илк ўйинини 19 август куни “Сантиаго Бернабеу” стадионида “Осасуна”га қарши ўтказади.
- Гарсия ҳозирга қадар “Реал Мадрид” асосий жамоаси сафида 12 та ўйинда майдонга тушиб, ўз ҳисобига 5 та го ва 2 та ассист ёздириб қўйган.
- Transfermarkt портали ҳужумчинин қийматини 8 миллион еврога баҳоламоқда.
Изоҳ (0)