Ўзбекистон Суперлигаси 17-туридан ўрин олган “Машъал” — “Динамо” учрашуви якунланди. Қизиқарли ва голларга бой кечган баҳсда самарқандликлар сафарда 4:2 ҳисобида ғалаба қозонди.
Учрашувда тезкор голлар киритилди. Дастлаб, 2-дақиқада “Машъал” футболчиси Шерзод Файзиев ҳисобни очди. Орадан уч дақиқа ўтиб, яъни 5-дақиқада Сардор Абдурайимов ҳисобни 2:0 кўринишига келтирди.
25-дақиқада “Динамо” ҳисобни қисқартиришга муваффақ бўлди — гол муаллифи Улуғбек Ҳошимов. Биринчи бўлим якуни арафасида, аниқроғи 45+5-дақиқада Жаҳонгир Абдусаломов ҳисобни тенглаштирди.
Иккинчи бўлим ҳам кескин ва муросасиз курашларга бой бўлди. Ҳар икки жамоа хавфли ҳужумлар уюштирди. Ўйин сўнгги дақиқаларида “Динамо” икки бор рақиб дарвозасини ишғол қилди ва муҳим ғалабага эришди. Ҳар икки голга Беҳрузбек Облақулов муаллифлик қилди.
Ушбу ғалабадан сўнг “Динамо” турнир жадвалининг 3-поғонасидан жой олди. 15 очкога эга “Машъал” эса 13-ўринда бормоқда.
Ўзбекистон Суперлигаси
17-тур
6 май, чоршанба
“Машъал” — “Динамо” 2:4
Голлар: 1:0 — Файзиев (2), 2:0 — Абдурайимов, 2:1 — Ҳошимов (25), 2:2 — Абдусаломов (45+5), 2:3 — Облақулов (89), 2:4 — Облақулов (90+2)
Изоҳ (0)