AQSH hukumati Yevropa Ittifoqi bilan savdo urushlari fonida Yevropani internetdan mahrum etish imkoniyatiga ega ekanligi ma’lum bo‘ldi. Bu haqda Yevropaning Politico nashri ekspertlar va IT sanoat vakillarining fikrlariga asoslanib xabar bermoqda.
Ta’kidlanishicha, Yevropa deyarli to‘liq Amerika bulutli xizmatlariga qaramdir, shu sababli AQSH prezidenti Donald Tramp savdo urushlari fonida nazariy jihatdan Yevropa Ittifoqining “internetini uzib qo‘yishi” mumkin.
“Trampning Yevropa Ittifoqi iqtisodiy manfaatlariga jiddiy zarar yetkazish maqsadida internetni uzib qo‘yish yoki boshqa chora ko‘rish haqidagi fikri yarim yil avvalgiga qaraganda endi unchalik xayoliy tuyulmayapti”, deydi Yevropada tartibga solish bo‘yicha tahliliy markaz rahbari Zak Mayers.
Shuningdek, Anexia bulutli xizmatlar provayderi rahbari Aleksandr Vindbixlerning qo‘shimcha qilishicha, Yevropa kompaniyalari Amerika xizmatlariga “nosog‘lom qaramlik” sharoitida uzoq vaqt davomida o‘z manfaatlarini himoya qilishga urinishdan qochib kelgan.
“Men AQSHning Grenlandiyani tortib olish bilan tahdid qilishini hech qachon kutmagan edim. Bu bulutni yopishdan ham aqlsizroq”, deya qo‘shimcha qildi Vindbixler.
Fransiyaning OVHcloud kompaniyasi rahbari Benjamin Revkolevskining fikricha, Yevropa Ittifoqidagi bulutli sektor o‘z manfaatlarini ilgari surishga haddan ziyod uzoq vaqt e’tibor bermay, asosiy diqqatni texnologik raqobatga qaratgan.
“Uzilish xavfi yangi voqelikdir. Bulut — xuddi suv jo‘mragiga o‘xshaydi. Vaqti kelib jo‘mrak yopilib qolsa-chi?”, dedi Benjamin Revkolevski.
Politico’ning ma’lum qilinishicha, Yevropa bulutli hisoblash bozorining asosiy qismi (66 foizdan ortig‘i) Amazon, Microsoft va Google kabi Amerika korporatsiyalari nazoratida. Shu sababli Yevropada ushbu kompaniyalarning Yevroittifoq davlatlari manfaatlariga zid ravishda Tramp ma’muriyati bilan til biriktirishlari ehtimoli borasidagi tashvishlar kuchaymoqda.
Izoh (0)