Хитойда кома ҳолатидаги қиз касалхона палатасига университетга қабул қилингани ҳақидаги хат келтирилганда ўзига келди. Бу ҳақда South China Morning Post хабар бермоқда.
Маълум бўлишича, Жианг Ченгнан исмли қиз 2025 йил июль ойи бошида университетга кириш имтиҳонларини топширганидан сўнг кўп ўтмай, иситма ва кўкрак қафасидаги оғриқ аломатлари билан тиббий ёрдамга мурожаат қилган. Шифокорлар унга фулминант миокардит — юрак мушакларининг камдан кам учрайдиган ва ўта оғир яллиғланиши ташхисини қўйишган. Қизда касалликнинг аниқ сабаби ҳали аниқланмаган, аммо эҳтимолий омилларга вирусли инфекциялар, кучли стресс ва ҳаддан ташқари чарчоқ киради.
Аҳволи ёмонлашгач, бемор реанимация бўлимига ўтказилган, у ерда сунъий нафас олиш аппарати ва юрак фаолиятини қўллаб-қувватлаш тизимига уланган. Тез орада у комага тушиб қолган. Жианг оиласи нафақат тиббий, балки молиявий инқирозга ҳам дуч келган.
Қизнинг отаси 2023 йилда автоҳалокатда жиддий жароҳат олган, ишлай олмайди ва уйда даволанмоқда. Онаси кўча овқатларини сотиш билан тирикчилик қилади, укаси эса ўрта мактабда ўқийди.
Ченгнаннинг даволаниши учун аллақачон 28 минг доллар сарфланган, шу сабабли унинг қариндошлари қарз олишга ва кредитлардан фойдаланишга мажбур бўлган. Бироқ команинг саккизинчи кунида хитойлик қизнинг отаси унинг Хуанхе транспорт университетига қабул қилингани ҳақидаги хатни олган. Дарҳол уни касалхонага олиб келиб, хатни каравот ёнида ушлаб туриб, бу хабардан оила аъзолари хурсанд эканини айтган.
Шу пайт қизнинг қовоқлари қимирлай бошлаган, эртаси куни эса у ҳушига келган. Шифокорларнинг айтишича, Жиангнинг юрак фаолияти тўлиқ тикланган, аҳволи барқарор. Шунга қарамай, бундай тез уйғонишнинг сабаби шифокорлар учун жумбоқлигича қолмоқда. Ҳозирда Жианг реанимациядан умумий палатага ўтказилган ва сентябрь ойида бошланадиган ўқишга тайёргарлик кўрмоқда.
Изоҳ (0)