5 август куни бўлиб ўтган йиғилишда Исроил бош вазири Биньямин Нетаньяху ва мамлакат Бош штаби раҳбари Эял Замир ўртасида сиёсатчининг бутун Ғазо секторига операцияларни кенгайтириш режалари юзасидан кескин баҳс-мунозара юзага келди. Бу ҳақда Исроил давлат телевидениеси KАN хабар бермоқда.
Замирнинг фикрича, бу режа Исроилни тузоққа тортиб, ҳарбийлар орасида катта йўқотишларга олиб келиши ва Ғазо секторида ҲАМАС радикал ҳаракати жангариларининг қўлида бўлган гаровдагиларни хавф остига қўйиши мумкин.
Бундан ташқари, Бош штаб раҳбари бош вазирнинг ўғли Яир Нетаньяхунинг “давлат тўнтаришига уринишни бошқараётгани” ҳақидаги гапларини эслатиб ўтган ва Фаластин анклавидаги уруш авж олган пайтда нима учун бундай ҳужумларга дучор бўлаётганини сўраган. Нетаньяху ўғли вояга етган инсон эканлигини таъкидлаган.
Шунингдек, Замир бош вазирни уни истеъфога чиқариш билан таҳдид қилмасликка чақирган.
Бир кун олдин BBC нашри Нетаньяху ҳарбийлар ва амалдорлар билан учрашувда Исроил мудофаа кучларининг операцияларини Ғазо секторининг бутун ҳудудига кенгайтиришни таклиф қилгани ҳақида хабар берган эди.
Таъкидланишича, армия қўмондонлари ва бошқа ҳарбий раҳбарлар бу режага қарши чиқишган. Бундан ташқари, Фаластиннинг ҲАМАС ҳаракати томонидан асирга олинганларнинг оила аъзолари бундай режалар уларнинг яқинларини хавф остига қўйиши мумкинлигидан ташвиш билдирганлар.
Бундан аввал Исроилнинг хавфсизлик соҳасида фаолият юритган 600 га яқин собиқ амалдори, жумладан Моссад ва Шин Бет ташкилотлари, армия ҳамда дипломатик корпуснинг собиқ раҳбарлари АҚШ президенти Дональд Трампга мурожаат қилиб, Ғазодаги урушни тўхтатиш учун Исроил ҳукуматига босим ўтказишни сўраганди.
Изоҳ (0)