Украина президенти Владимир Зеленский АҚШ президенти Дональд Трамп билан телефон орқали суҳбатлашганини маълум қилди. Суҳбатда номи ошкор этилмаган Европа етакчилари ҳам иштирок этган.
Муҳокама Трампнинг вакили Стивен Виткофф ва Россия президенти Владимир Путиннинг Москвадаги учрашуви натижаларига бағишланган.
Зеленскийнинг таъкидлашича, Украина ва унинг ҳамкорларининг позицияси аниқ: уруш адолатли шартлар асосида тугаши керак.
“Биз Москвада айтилган гапларни муҳокама қилдик. Украина, шубҳасиз, ўз мустақиллигини ҳимоя қилади. Барчамизга мустаҳкам ва ишончли тинчлик зарур. Россия ўзи бошлаган урушни тўхтатиши шарт”, дея ёзди у.
Суҳбат Зеленский Суми вилоятидаги фронт чизиғидан қайтаётган пайтда бўлиб ўтган. У Европа етакчиларига қўллаб-қувватлаганлари учун миннатдорчилик билдириб, тинчликка эришиш йўлидаги ҳамкорлик муҳимлигини таъкидлаган.
Украина раҳбари мамлакатининг узоқ муддатли тинчликка интилиб, мустақилликни ҳимоя қилишни давом эттиришини айтган. Шунингдек, у можарода Украинани қўллаб-қувватлаётган барчага ташаккур билдирган.
Бугун, 6 август куни Америка Қўшма Штатлари президентининг Украина бўйича махсус вакили Стив Уиткофф Кремлда Россия президенти Владимир Путин билан музокаралар ўтказди.
АҚШ президенти Дональд Трамп ушбу чрашувни “жуда самарали” деб баҳолаган. Унинг сўзларига кўра, музокаралар давомида “сезиларли ютуқларга эришилган” ва “барча урушни тугатиш зарурлигига рози” эканини таъкидлаган.
“Менинг махсус вакилим Стив Уиткофф яқинда Россия президенти Владимир Путин билан ғоят самарали учрашув ўтказди. Катта муваффақиятларга эришилди! Шундан сўнг мен айрим Европалик иттифоқчиларимизни хабардор қилдим. Барча уруш тўхташи кераклигига рози ва биз бу борада келгуси кунлар ва ҳафталарда иш олиб борамиз”, - дея ёзган Америка раҳбари Truth Social ижтимоий тармоғидаги саҳифасида.
Изоҳ (0)