Давлат активларини бошқариш агентлиги 9 июнь куни Universal Mobile Systems (Mobiuz) устав капиталидаги 100 фоиз давлат улушини хусусийлаштириш жараёни бошланганини эълон қилди.
Халқаро даражада хусусийлаштириш жараёнини муваффақиятли ва самарали ташкил этиш мақсадида Rothschild & Cо халқаро инвестиция банки битим бўйича етакчи стратегик ва молиявий консултант сифатида, KPMG халқаро компанияси — молиявий консултант сифатида ҳамда молиявий, солиқ ва юридик экспертиза (vendor due diligencе) ўтказиш бўйича, шунингдек, мустақил баҳоловчи сифатида Deloitte халқаро компанияси жалб қилинган.
Хусусийлаштириш жараёни очиқ рақобат асосида амалга оширилади, унда маҳаллий ва халқаро талабгорлар иштирок этиши мумкин.
Савдо жараёни уч босқичда амалга оширилади:
- сотиб олиш бўйича қизиқиш билдириш (Expression of interest / EoI);
- мажбуриятга эга бўлмаган таклифларни қабул қилиш (NBО);
- мажбуриятга эга бўлган таклифларни қабул қилиш (BО).
Биринчи босқичда талабгорлар ариза билан бирга, ўзлари ҳақида маълумот (рўйхатдан ўтганлиги, фаолият тури), устав капиталида 5 фоиздан ортиқ улушга эга акциядорлар ва якуний бенефициарлар тўғрисида маълумот ҳамда сўнгги 3 йиллик молиявий ҳисоботни тақдим этиши керак.
Аризалар молиявий ресурсларнинг етарлилиги, хусусийлаштиришда иштирокини тақиқловчи маъмурий ёки бошқа суд жараёнларининг йўқлиги, жиноий фаолиятдан олинган даромадларни легаллаштиришга оид Ўзбекистон қонунчилигига риоя этилиши асосида сараланади.
Шу билан бирга, талабгорлар ва уларнинг акциядорлари давлат компанияси бўлмаслиги, Европа Иттифоқи, АҚШ ҳамда халқаро молия институтларининг санкциялари рўйхатига киритилмаган, санкцияларга қарши фаолиятга жалб қилинмаган бўлиши керак.
Талабгорлардан аризалар 2025 йил 1 август соат 18:00 гача қабул қилинади.
Mobiuz ҳақида
Universal Mobile Systems МЧЖ Ўзбекистонда Mobiuz савдо белгиси остида фаолият юритадиган телекоммуникация корхонаси бўлиб, замонавий мобил уяли алоқа хизматлари ва мобил интернет хизматларини 4G LTE, UMTS ва GSМ стандартларида тақдим этади. 2024 йил якунига кўра, корхонанинг соф тушуми 2 086 миллиард сўм ва абонентлари сони 7,8 миллион нафарни ташкил этади. Шу ўринда, Ўзбекистон иқтисодининг ва аҳолисининг ҳозирги ўсиш суръатлари бу бозорда катта имкониятлар борлигидан далолат беради.
Президентнинг 2025 йил 21 апрелида имзоланган фармонига асосан, сотиладиган йирик компаниялар рўйхатига Mobiuzъдан ташқари UzAuto Моtors, GTL, “Ўзметкомбинат” ва бошқалар ҳам киритилган. 29 та давлат иштирокидаги йирик корхона устав капиталидаги акциялар пакетини нуфузли халқаро профессионал консултантларни жалб қилган ҳолда оммавий савдоларга чиқариш белгиланган.
Изоҳ (0)