Сурия хавфсизлик кучлари мамлакат собиқ президенти Башар Асаднинг амакиваччасини қўлга олди. У гиёҳванд моддалар савдоси ва бошқа ҳуқуқбузарликларда айбланмоқда. Бу ҳақда республика Ички ишлар вазирлигига таяниб SANA хабар берди.
Васим Асад Сурия-Ливан чегарасида Умумий разведка хизмати ва Ички ишлар вазирлиги ходимлари томонидан ушланган. У гиёҳванд моддалар савдоси билан шуғуллангани ва Башар Асад даврида бир нечта жиноятларга алоқадор бўлгани айтилмоқда.
2025 йил баҳорида Европа Иттифоқи ва Қўшма Штатлар унга қарши санкциялар киритган. У ўшанда каптагон ва амфетамин савдосида айбланганди. Васим Бади ал-Асад Сурия армияси таркибидаги ҳарбийлаштирилган бўлинмага қўмондонлик қилган.
У “режимни қўллаб-қувватлаш учун секта милицияларини тузишга оммавий чақирган” ва “гиёҳванд моддаларнинг ноқонуний айланиши бўйича минтақавий тармоқда асосий шахс” ҳисобланади, дея таъкидлайди АҚШ Молия вазирлиги.
Санкциялар президентнинг амакиваччаси Самир Асадга ҳам таъсир қилган. АҚШ ва Сурия расмийларига кўра, у Ўрта Ер денгизи соҳилида жойлашган Латакия ва Каламун шаҳарлари ҳудудидаги каптагон гиёҳвандлик воситасини ишлаб чиқариш бўйича асосий объектларни назорат қилган.
2024 йилда Ливан пойтахти Байрут аэропортида мамлакатни сохта Сурия паспортлари билан тарк этишга уринган Сурия президенти қариндошлари — амакиваччаси Дурейднинг рафиқаси ва қизи қўлга олинган эди.
Башар Асад 8 декабрь куни Сурия пойтахти Дамашққа ҳукуматга қарши кучлар кириб келганида шаҳарни ташлаб, Россияга бошпана сўраб кетган. Асад ҳокимиятдан ағдарилгач, унинг оиласи ва яқинларининг активлари “халқаро миқёсда овланиб”, пул ювиш ва хорижда кўчмас мулк сотиб олиш билан боғлиқ терговлар бошланган.
Изоҳ (0)