Украина расмийлари Россия билан ўт очишни тўхтатиш бўйича эҳтимолий музокаралар учун бир қатор “қизил чизиқлар”ни белгилади. Бу ҳақда Украина ҳукуматидаги юқори мартабали манбаларга таяниб, The Independent хабар берди.
Ҳеч қандай қўшимча ҳудудий имтиёзлар йўқ
Нашр суҳбатдошларига кўра, муҳим шартлардан бири – Россия президенти Владимир Путиннинг Украинанинг тўрт вилоятини тўлиқ эгаллаш истагига қарамай, қўшимча ҳудудий имтиёзлар беришдан бош тортишдир. Бу вилоятлардан иккитаси Россия ҳарбийлари томонидан 2014 йилдан бери қисман босиб олинган бўлиб, 2022 йилда кенг кўламли босқин ортидан ноқонуний “референдумлар” асосида Москва томонидан аннексия қилинган.
Украина фронт чизиғи ҳозирги ҳолатда музлатилишига ва Россиянинг босиб олинган ҳудудларнинг бир қисмини сақлаб қолишига кўнгани, аммо қўшимча ҳудудларни топшириш мутлақо қабул қилиб бўлмаслигини “қизил чизиқ” сифатида белгилаган, дейилади хабарда.
Масалан, Запороже ёки Херсонни тўлиқ топширишни талаб қилиш – мутлақо мантиқсиз. Бу биз учун бутунлай сафсатадай туюлади, дейди манбалар.
Шу билан бирга, Россия томонидан 2022 йил февралидан кейин босиб олинган ҳудудларнинг келажаги ҳали ҳал қилинмаган. Украина расмийлари эса бу ҳудудларни дипломатик йўл билан қайтариш учун барча чораларни кўришларини таъкидлаган.
Украиналик болаларни қайтариш ва хавфсизлик кафолатлари
Киев амал қиладиган бошқа “қизил чизиқлар” Россия томонидан ўғирлаб кетилган минглаб украиналик болалар ва минглаб ноқонуний ушлаб турилган тинч аҳолини қайтаришни ўз ичига олади. Улар ҳарбий асирлар ҳисобланмайди ва шунинг учун асирлар алмашинувига тушмайди. Бундан ташқари, Украина Россия ҳукумати ўт очишни тўхтатиш тўғрисидаги келишувни бузган тақдирда халқаро хавфсизлик кафолатларини талаб қилмоқда.
Биз ҳақиқатан ҳам тинчлик тузишга тайёрмиз, аммо бизга қисқа муддатли ўт очишни тўхтатиш эмас, балки узоқ муддатли тинчлик керак. Биз фарзандларимизнинг бу урушда жанг қилишини истамаймиз, деди нашрнинг юқори мартабали манбаси.
The Independent суҳбатдошлари Москва ҳақиқатан ҳам келишувни қабул қилишига ишонмайди ва Россия расмийлари томонидан “навбатдаги ҳийла-найрангни кутмоқда”.
Изоҳ (0)