Босиб олинган Украина ҳудудларидан депортация қилинган болаларнинг Украина фуқаролиги бекор қилинди, уларни рус оилаларига жойлаштиришда Россия президентининг самолётлари ва маблағларидан фойдаланилди. Бу ҳақда Йель соғлиқни сақлаш мактаби томонидан эълон қилинган ҳисоботда маълумот берилди.
АҚШ Давлат департаменти томонидан қўллаб-қувватланган тадқиқотда Украинани тизимли равишда руслаштириш бўйича Кремль томонидан молиялаштирилган дастур доирасида урушнинг дастлабки ойларида Россияга олиб келинган 314 нафар украиналик болалар ҳақида батафсил маълумотлар берилган.
2023 йил март ойида Халқаро жиноий суд (ХЖС) Владимир Путин ва Россиянинг болалар масалалари бўйича комиссари Мария Лвова-Беловани украиналик болаларни депортация қилиш билан боғлиқ ҳарбий жиноятда айблаб, ҳибсга олишга ордер берган эди.
Reuters нашрига тақдим этилган янги ҳисоботда депортация дастури ва унга алоқадор бўлганлар билан боғлиқ тафсилотлар, жумладан, дастур ва Путин ўртасидаги илгари номаълум бўлган алоқалар келтирилган.
Йель гуманитар тадқиқот лабораторияси ижрочи директори, тадқиқотчи Натаниэл Раймонд тадқиқот натижаларини БМТ Хавфсизлик Кенгашига тақдим этишни режалаштираётганини маълум қилган. Раймондга кўра, ҳисобот “Украиналик болаларнинг депортацияси Кремль бошчилигидаги тизимли дастурнинг бир қисми” эканидан далолат беради.
Мажбурий кўчириш халқаро ҳуқуққа кўра инсониятга қарши жиноят ҳисобланади. Инсониятга қарши жиноятлар, одатда, Путин ҳам айблаётган ҳарбий жиноятлардан ҳам жиддийроқ ҳисобланади.
Тадқиқот 20 ой давомида Россия ҳукуматининг фарзанд асраб олиш ҳақидаги учта маълумотлар базасидан олинган маълумотларга асосланган.
“Йель тергови таклиф этилаётган дастурнинг моддий-техник таъминоти ва молиялаштирилишини белгилаб берди ва 314 нафар боланинг шахсини тасдиқлади”, деди Раймонд.
Тадқиқот Давлат департаментининг президент Жо Байден бошчилигидаги Россия ва Украинадаги россияпараст кучлар томонидан халқаро ҳуқуқ бузилиши ва инсониятга қарши жиноятларни ҳужжатлаштириш ташаббуси доирасида ўтказилди.
Изоҳ (0)